[649] Tena kho pana samayena nānāverajjakānaṃ brāhmaṇānaṃ pañcamattāni brāhmaṇasatāni opāsāde paṭivasanti kenacideva karaṇīyena . assosuṃ kho te brāhmaṇā caṅkī kira brāhmaṇo samaṇaṃ gotamaṃ dassanāya upasaṅkamissatīti . atha te brāhmaṇā yena caṅkī brāhmaṇo tenupasaṅkamiṃsu upasaṅkamitvā caṅkiṃ brāhmaṇaṃ etadavocuṃ saccaṃ kira bhavaṃ caṅkī samaṇaṃ gotamaṃ dassanāya upasaṅkamissatīti. Evaṃ kho bho hoti ahaṃpi samaṇaṃ gotamaṃ dassanāya upasaṅkamissāmīti. {649.1} Mā bhavaṃ caṅkī samaṇaṃ gotamaṃ dassanāya upasaṅkami na arahati bhavaṃ caṅkī samaṇaṃ gotamaṃ dassanāya upasaṅkamituṃ samaṇo tveva gotamo arahati bhavantaṃ caṅkiṃ dassanāya upasaṅkamituṃ bhavañhi caṅkī ubhatosujāto mātito ca pitito ca saṃsuddhagahaṇiko yāva sattamā pitāmahayugā akkhitto Anupakkuṭṭho jātivādena yampi bhavaṃ caṅkī ubhatosujāto mātito ca pitito ca saṃsuddhagahaṇiko yāva sattamā pitāmahayugā akkhitto anupakkuṭṭho jātivādena imināpaṅgena na arahati bhavaṃ caṅkī samaṇaṃ gotamaṃ dassanāya upasaṅkamituṃ samaṇo tveva gotamo arahati bhavantaṃ caṅkiṃ dassanāya upasaṅkamituṃ {649.2} bhavañhi caṅkī addho mahaddhano mahābhogo bhavañhi caṅkī tiṇṇaṃ vedānaṃ pāragū sanighaṇḍukeṭubhānaṃ sākkharappabhedānaṃ itihāsapañcamānaṃ padako veyyākaraṇo lokāyatamahāpurisalakkhaṇesu anavayo bhavañhi caṅkī abhirūpo dassanīyo pāsādiko paramāya vaṇṇapokkharatāya samannāgato brahmavaṇṇī brahmavacchasī akhuddāvakāso dassanāya bhavañhi caṅkī sīlavā buḍḍhasīlī buḍḍhasīlena samannāgato bhavañhi caṅkī kalyāṇavāco kalyāṇavākkaraṇo poriyā vācāya samannāgato visaṭṭhāya anelagaḷāya atthassa viññāpaniyā bhavañhi caṅkī bahunnaṃ ācariyapācariyo tīṇi māṇavakasatāni mante vāceti bhavañhi caṅkī rañño pasenadissa kosalassa sakkato garukato mānito pūjito apacito bhavañhi caṅkī brāhmaṇassa pokkharasātissa sakkato garukato mānito pūjito apacito bhavañhi caṅkī opāsādaṃ ajjhāvasati sattussadaṃ satiṇakaṭṭhodakaṃ sadhaññaṃ rājabhoggaṃ raññā pasenadinā kosalena dinnaṃ rājadāyaṃ brahmadeyyaṃ yampi bhavaṃ caṅkī opāsādaṃ ajjhāvasati sattussadaṃ satiṇakaṭṭhodakaṃ