[650] Evaṃ vutte caṅkī brāhmaṇo te brāhmaṇe etadavoca tenahi bho mamāpi suṇātha yathā yathā mayameva arahāma taṃ samaṇaṃ gotamaṃ dassanāya upasaṅkamituṃ na tveva arahati so bhavaṃ gotamo amhākaṃ dassanāya upasaṅkamituṃ samaṇo khalu bho gotamo ubhatosujāto mātito ca pitito ca saṃsuddhagahaṇiko yāva sattamā pitāmahayugā akkhitto anupakkuṭṭho jātivādena yampi samaṇo gotamo ubhatosujāto .pe. jātivādena imināpaṅgena na arahati so bhavaṃ gotamo amhākaṃ dassanāya upasaṅkamituṃ atha kho mayameva arahāma taṃ bhavantaṃ gotamaṃ dassanāya upasaṅkamituṃ samaṇo khalu bho gotamo pahūtaṃ hiraññasuvaṇṇaṃ ohāya pabbajito bhūmigataṃ ca vehāsaṭṭhañca samaṇo khalu bho gotamo daharova samāno susukāḷakeso bhadrena yobbanena samannāgato paṭhamena vayasā agārasmā anagāriyaṃ pabbajito samaṇo khalu bho gotamo akāmakānaṃ mātāpitūnaṃ assumukhānaṃ rudantānaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajito samaṇo khalu bho gotamo abhirūpo dassanīyo pāsādiko paramāya Vaṇṇapokkharatāya samannāgato brahmavaṇṇī brahmavacchasī akhuddāvakāso dassanāya samaṇo khalu bho gotamo sīlavā ariyasīlī kusalasīlī kusalena sīlena samannāgato samaṇo khalu bho gotamo kalyāṇavāco kalyāṇavākkaraṇo poriyā vācāya samannāgato visaṭṭhāya anelagaḷāya atthassa viññāpaniyā samaṇo khalu bho gotamo bahunnaṃ ācariyapācariyo {650.1} samaṇo khalu bho gotamo khīṇakāmarāgo vigatacāpallo samaṇo khalu bho gotamo kammavādī kiriyavādī apāpapurekkhāro brahmaññāya pajāya samaṇo khalu bho gotamo uccākulā pabbajito asaṃbhinnā khattiyakulā samaṇo khalu bho gotamo addhakulā pabbajito mahaddhanā mahābhogā samaṇaṃ khalu bho gotamaṃ tiroraṭṭhā tirojanapadā saṃpucchituṃ āgacchanti samaṇaṃ khalu bho gotamaṃ anekāni devatāsahassāni pāṇena saraṇaṃ gatāni samaṇaṃ khalu bho gotamaṃ evaṃkalyāṇo kittisaddo abbhuggato itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavāti {650.2} samaṇo khalu bho gotamo dvattiṃsamahāpurisalakkhaṇehi samannāgato samaṇaṃ khalu bho gotamaṃ rājā māgadho seniyo bimbisāro saputtadāro pāṇehi saraṇaṃ gato samaṇaṃ khalu bho gotamaṃ rājā pasenadi kosalo [3]- pāṇehi saraṇaṃ gato samaṇaṃ khalu bho gotamaṃ brāhmaṇo pokkharasāti Saputtadāro pāṇehi saraṇaṃ gato {650.3} samaṇo khalu bho gotamo opāsādaṃ anuppatto opāsāde viharati uttarena opāsādaṃ devavane sālavane ye pana kho keci samaṇā vā brāhmaṇā vā amhākaṃ gāmakkhettaṃ āgacchanti atithino te honti atithī kho panamhehi sakkātabbā garukātabbā mānetabbā pūjetabbā yampi bho samaṇo gotamo opāsādaṃ anuppatto opāsāde viharati uttarena opāsādaṃ devavane sālavane atithimhākaṃ samaṇo gotamo atithi kho panamhehi sakkātabbo garukātabbo mānetabbo pūjetabbo imināpaṅgena na arahati so bhavaṃ gotamo amhākaṃ dassanāya upasaṅkamituṃ atha kho mayameva arahāma taṃ bhavantaṃ gotamaṃ dassanāya upasaṅkamituṃ ettakaṃ kho ahaṃ bho tassa bhoto gotamassa vaṇṇaṃ pariyāpuṇāmi na ca so bhavaṃ gotamo ettakavaṇṇo apparimāṇavaṇṇo hi so bhavaṃ gotamo ekamekenapi bho aṅgena samannāgato na arahati so bhavaṃ gotamo amhākaṃ dassanāya upasaṅkamituṃ atha kho mayameva arahāma taṃ bhavantaṃ gotamaṃ dassanāya upasaṅkamitunti . tenahi bho sabbeva mayaṃ samaṇaṃ gotamaṃ dassanāya upasaṅkamissāmāti. {650.4} Atha kho caṅkī brāhmaṇo mahatā brāhmaṇagaṇena saddhiṃ yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi. Tena kho pana Samayena bhagavā vuḍḍhehi vuḍḍhehi brāhmaṇehi saddhiṃ kiñci kiñci kathaṃ sārāṇīyaṃ vītisāretvā nisinno hoti.