[651] Tena kho pana samayena kāpadiko nāma māṇavo daharo vuttasiro soḷasavassuddesiko jātiyā tiṇṇaṃ vedānaṃ pāragū sanighaṇḍu keṭubhānaṃ sākkharappabhedānaṃ itihāsapañcamānaṃ padako veyyākaraṇo lokāyatamahāpurisalakkhaṇesu anavayo tassaṃ parisāyaṃ nisinno hoti . so vuḍḍhānaṃ vuḍḍhānaṃ brāhmaṇānaṃ bhagavatā saddhiṃ mantayamānānaṃ antarantarā kathaṃ opāteti . atha kho bhagavā kāpadikaṃ māṇavaṃ apasādesi mā āyasmā bhāradvājo vuḍḍhānaṃ vuḍḍhānaṃ brāhmaṇānaṃ mantayamānānaṃ antarantarā kathaṃ opātesi kathāpariyosānaṃ āyasmā bhāradvājo āgametūti.

[652] Evaṃ vutte caṅkī brāhmaṇo bhagavantaṃ etadavoca mā bhavaṃ gotamo kāpadikaṃ māṇavaṃ apasādesi kulaputto ca kāpadiko māṇavo bahussuto ca kāpadiko māṇavo paṇḍito ca kāpadiko māṇavo kalyāṇavākkaraṇo ca kāpadiko māṇavo pahoti ca kāpadiko māṇavo bhotā gotamena saddhiṃ asmiṃ vacane patimantetunti . atha kho bhagavato etadahosi addhā kho kāpadikassa māṇavassa tevijjake pāvacane kataṃ bhavissati tathā hi naṃ brāhmaṇā saṃpurekkharontīti . atha kho kāpadikassa māṇavassa Etadahosi yadā me samaṇo gotamo cakkhunā cakkhuṃ upasaṃharissati athāhaṃ samaṇaṃ gotamaṃ pañhaṃ pucchissāmīti. {652.1} Atha kho bhagavā kāpadikassa māṇavassa cetasā ceto parivitakkamaññāya yena kāpadiko māṇavo tena cakkhūni upasaṃhāsi . Atha kho kāpadikassa māṇavassa etadahosi samannāharati kho maṃ samaṇo gotamo yannūnāhaṃ samaṇaṃ gotamaṃ pañhaṃ puccheyyanti . atha kho kāpadiko māṇavo bhagavantaṃ etadavoca yadidaṃ bho gotama brāhmaṇānaṃ porāṇaṃ mantapadaṃ itihītihaparaṃparāya piṭakasampadāya tattha ca brāhmaṇā ekaṃsena niṭṭhaṃ gacchanti idameva saccaṃ moghamaññanti idha bhavaṃ gotamo kimāhāti.

[653] Kiṃ pana bhāradvāja atthi koci brāhmaṇānaṃ ekabrāhmaṇopi yo evamāha ahametaṃ jānāmi ahametaṃ passāmi idameva saccaṃ moghamaññanti . no hidaṃ bho gotama . kiṃ pana bhāradvāja atthi koci brāhmaṇānaṃ ekācariyopi ekācariyapācariyopi yāva sattamā ācariyamahayugā yo evamāha ahametaṃ jānāmi ahametaṃ passāmi idameva saccaṃ moghamaññanti . no hidaṃ bho gotama . kiṃ pana bhāradvāja yepi te brāhmaṇānaṃ pubbakā isayo mantānaṃ kattāro mantānaṃ pavattāro yesamidaṃ etarahi brāhmaṇā porāṇaṃ mantapadaṃ gītaṃ pavuttaṃ samihitaṃ tadanugāyanti tadanubhāsanti bhāsitamanubhāsanti vācitamanuvācenti seyyathīdaṃ Aṭṭhako vāmako vāmadevo vessāmitto yamataggi aṅgīraso bhāradvājo vāseṭṭho kassapo bhagu tepi evamāhaṃsu mayametaṃ jānāma mayametaṃ passāma idameva saccaṃ moghamaññanti . no hidaṃ bho gotama.