[654] Iti kira bhāradvāja natthi koci brāhmaṇānaṃ ekabrāhmaṇopi yo evamāha ahametaṃ jānāmi ahametaṃ passāmi idameva saccaṃ moghaññanti natthi koci brāhmaṇānaṃ ekācariyopi ekācariya- pācariyopi yāva sattamā ācariyamahayugā yo evamāha ahametaṃ jānāmi ahametaṃ passāmi idameva saccaṃ moghamaññanti yepi te brāhmaṇānaṃ pubbakā isayo mantānaṃ kattāro mantānaṃ pavattāro yesamidaṃ etarahi brāhmaṇā porāṇaṃ mantapadaṃ gītaṃ pavuttaṃ samihitaṃ tadanugāyanti tadanubhāsanti bhāsitamanubhāsanti vācitamanuvācenti seyyathīdaṃ aṭṭhako vāmako vāmadevo vessāmitto yamataggi aṅgīraso bhāradvājo vāseṭṭho kassapo bhagu tepi na evamāhaṃsu mayametaṃ jānāma mayametaṃ passāma idameva saccaṃ moghamaññanti. {654.1} Seyyathāpi bhāradvāja andhaveṇi paramparāsaṃsattā purimopi na passati majjhimopi na passati pacchimopi na passati evameva kho bhāradvāja andhaveṇūpamaṃ maññe brāhmaṇānaṃ bhāsitaṃ sampajjati purimopi na passati majjhimopi na passati pacchimopi na passati taṃ kiṃ maññasi Bhāradvāja nanu evaṃ sante brāhmaṇānaṃ amūlikā saddhā sampajjatīti . na khvettha bho gotama brāhmaṇā saddhāyayeva payirupāsanti anussavāpettha brāhmaṇā payirupāsantīti.

[655] Pubbeva kho tvaṃ bhāradvāja saddhaṃ agamāsi anussavaṃ idāni vadesi pañca kho ime bhāradvāja dhammā diṭṭheva dhamme dvidhāvipākā katame pañca saddhā ruci anussavo ākāraparivitakko diṭṭhinijjhānakkhanti ime kho bhāradvāja pañca dhammā diṭṭheva dhamme dvidhāvipākā apica bhāradvāja susaddahitaṃ yeva hoti tañca hoti rittaṃ tucchaṃ musā no cepi susaddahitaṃ hoti tañca hoti bhūtaṃ tacchaṃ anaññathā apica bhāradvāja surucitaṃyeva hoti .pe. svānussutaṃyeva hoti .pe. suparivitakkaṃyeva hoti .pe. sunijjhāyitaṃyeva hoti tañca hoti rittaṃ tucchaṃ musā no cepi sunijjhāyitaṃ hoti tañca hoti bhūtaṃ tacchaṃ anaññathā saccaṃ anurakkhatā bhāradvāja viññunā purisena nālamettha ekaṃsena niṭṭhaṃ gantuṃ idameva saccaṃ moghamaññanti . kittāvatā pana bho gotama saccānurakkhaṇā hoti kittāvatā saccamanurakkhati saccānurakkhaṇaṃ mayaṃ bhavantaṃ gotamaṃ pucchāmāti.