[661] Evamme sutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . atha kho esukārī brāhmaṇo yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi.

[662] Ekamantaṃ nisinno kho esukārī brāhmaṇo bhagavantaṃ etadavoca brāhmaṇā bho gotama catasso pāricariyā paññapenti brāhmaṇassa pāricariyaṃ paññapenti khattiyassa pāricariyaṃ paññapenti vessassa pāricariyaṃ paññapenti suddassa pāricariyaṃ paññapenti tatridaṃ bho gotama brāhmaṇā brāhmaṇassa pāricariyaṃ paññapenti brāhmaṇo vā brāhmaṇaṃ paricareyya khattiyo vā brāhmaṇaṃ paricareyya vesso vā brāhmaṇaṃ paricareyya suddo vā brāhmaṇaṃ paricareyyāti idaṃ kho bho gotama brāhmaṇā brāhmaṇassa pāricariyaṃ paññapenti tatridaṃ bho gotama brāhmaṇā khattiyassa pāricariyaṃ paññapenti khattiyo vā khattiyaṃ paricareyya vesso vā khattiyaṃ paricareyya suddo vā khattiyaṃ paricareyyāti idaṃ kho bho gotama brāhmaṇā khattiyassa pāricariyaṃ paññapenti tatridaṃ bho gotama brāhmaṇā vessassa pāricariyaṃ paññapenti vesso vā vessaṃ paricareyya suddo vā Vessaṃ paricareyyāti idaṃ kho bho gotama brāhmaṇā vessassa pāricariyaṃ paññapenti tatridaṃ bho gotama brāhmaṇā suddassa pāricariyaṃ paññapenti suddova suddaṃ paricareyya ko panañño suddaṃ paricarissatīti idaṃ kho bho gotama brāhmaṇā suddassa pāricariyaṃ paññapenti brāhmaṇā bho gotama imā catasso pāricariyā paññapenti idaṃ bhavaṃ gotamo kimāhāti.

[663] Kiṃ pana brāhmaṇa sabbo loko brāhmaṇānaṃ etadabbhanujānāti imā catasso pāricariyā paññapentūti . No hidaṃ bho gotama . seyyathāpi brāhmaṇa puriso daḷiddo assako anāḷhiyo tassa akāmassa visaṃ olaggeyyuṃ idante ambho purisa maṃsaṃ khāditabbaṃ mūlañca anuppadātabbanti evameva kho brāhmaṇa brāhmaṇā appaṭiññāya tesaṃ samaṇabrāhmaṇānaṃ atha ca panimā catasso pāricariyā paññapenti . nāhaṃ brāhmaṇa sabbaṃ paricaritabbanti vadāmi na panāhaṃ brāhmaṇa sabbaṃ na paricaritabbanti vadāmi. {663.1} Yaṃ hissa brāhmaṇa paricarato pāricariyāhetu pāpiyo assa na seyyo nāhantaṃ paricaritabbanti vadāmi yañca khvassa brāhmaṇa paricarato pāricariyāhetu seyyo assa na pāpiyo tamahaṃ paricaritabbanti vadāmi . khattiyañcepi brāhmaṇa evaṃ puccheyyuṃ yaṃ vā te paricarato pāricariyāhetu pāpiyo assa na seyyo yaṃ vā te paricarato pāricariyāhetu seyyo Assa na pāpiyo tamettha paricareyyāsīti . khattiyopi hi brāhmaṇa sammā byākaramāno evaṃ byākareyya yaṃ hi me paricarato pāricariyāhetu pāpiyo assa na seyyo nāhantaṃ paricareyyaṃ yañca kho me paricarato pāricariyāhetu seyyo assa na pāpiyo tamahaṃ paricareyyanti . brāhmaṇaṃ cepi brāhmaṇa ... vessaṃ cepi brāhmaṇa ... suddaṃ cepi brāhmaṇa evaṃ puccheyyuṃ yaṃ vā te paricarato pāricariyāhetu pāpiyo assa na seyyo yaṃ vā te paricarato pāricariyāhetu seyyo assa na pāpiyo tamettha paricareyyāsīti . suddopi brāhmaṇa sammā byākaramāno evaṃ byākareyya yaṃ hi me paricarato pāricariyāhetu pāpiyo assa na seyyo nāhantaṃ paricareyyaṃ yañca kho me paricarato pāricariyāhetu seyyo assa na pāpiyo tamahaṃ paricareyyanti.