[700] Taṃ kiṃ maññasi dhanañjāni katamaṃ seyyo nirayo vā tiracchānayoni vāti . nirayā bho sārīputta tiracchānayoni seyyoti. Taṃ kiṃ maññasi dhanañjāni katamaṃ seyyo tiracchānayoni vā pittivisayo vāti . tiracchānayoniyā bho sārīputta pittivisayo seyyoti . taṃ kiṃ maññasi dhanañjāni katamaṃ seyyo pittivisayo vā manussā vāti . pittivisayā bho sārīputta manussā seyyoti. Taṃ kiṃ maññasi dhanañjāni katamaṃ seyyo manussā vā cātummahārājikā devā vāti . manussehi bho sārīputta cātummahārājikā devā seyyoti. {700.1} Taṃ kiṃ maññasi dhanañjāni katamaṃ seyyo cātummahārājikā devā vā tāvatiṃsā devā vāti . cātummahārājikehi bho sārīputta devehi tāvatiṃsā devā seyyoti . taṃ kiṃ maññasi dhanañjāni katamaṃ seyyo tāvatiṃsā devā vā yāmā devā vāti . tāvatiṃsehi bho sārīputta devehi yāmā devā seyyoti . taṃ kiṃ maññasi dhanañjāni katamaṃ seyyo yāmā devā vā tusitā devā vāti . Yāmehi bho sārīputta devehi tusitā devā seyyoti . taṃ kiṃ maññasi dhanañjāni katamaṃ seyyo tusitā devā vā nimmānaratī devā vāti . Tusitehi bho sārīputta devehi nimmānaratī devā seyyoti . taṃ kiṃ maññasi dhanañjāni katamaṃ seyyo nimmānaratī devā vā paranimmitavasavattī devā Vāti . nimmānaratīhi bho sārīputta devehi paranimmitavasavattī devā seyyoti. {700.2} Taṃ kiṃ maññasi dhanañjāni katamaṃ seyyo paranimmitavasavattī devā vā brahmaloko vāti . brahmalokoti bhavaṃ sārīputto āha brahmalokoti bhavaṃ sārīputto āhāti . atha kho āyasmato sārīputtassa etadahosi ime kho brāhmaṇā brahmalokādhimuttā yannūnāhaṃ dhanañjānissa brāhmaṇassa brahmānaṃ sahabyatāya maggaṃ deseyyanti . brahmānaṃ dhanañjāni sahabyatāya maggaṃ desessāmi taṃ suṇāhi sādhukaṃ manasikarohi bhāsissāmīti . evaṃ bhoti kho dhanañjāni brāhmaṇo āyasmato sārīputtassa paccassosi.
[701] Āyasmā sārīputto etadavoca katamo ca dhanañjāni brahmānaṃ sahabyatāya maggo idha dhanañjāni bhikkhu mettāsahagatena cetasā ekaṃ disaṃ pharitvā viharati tathā dutiyaṃ tathā tatiyaṃ tathā catutthaṃ iti uddhamadho tiriyaṃ sabbadhi sabbatthatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyāpajjhena pharitvā viharati ayampi kho dhanañjāni brahmānaṃ sahabyatāya {701.1} maggo puna caparaṃ dhanañjāni bhikkhu karuṇāsahagatena cetasā ... muditāsahagatena cetasā ... upekkhāsahagatena cetasā ekaṃ disaṃ pharitvā viharati tathā dutiyaṃ tathā tatiyaṃ tathā catutthaṃ iti uddhamadho tiriyaṃ sabbadhi sabbatthatāya sabbāvantaṃ Lokaṃ upekkhāsahagatena cetasā vipulena mahaggatena appamāṇena averena abyāpajjhena pharitvā viharati ayaṃ kho dhanañjāni brahmānaṃ sahabyatāya maggoti . tenahi bho sārīputta mama vacanena bhagavato pāde sirasā vandāhi dhanañjāni bhante brāhmaṇo ābādhiko dukkhito bāḷhagilāno so bhagavato pāde sirasā vandatīti.