[702] Atha kho āyasmā sārīputto dhanañjāniṃ brāhmaṇaṃ sati uttarikaraṇīye hīne brahmaloke patiṭṭhāpetvā uṭṭhāyāsanā pakkāmi . atha kho dhanañjāni brāhmaṇo acirapakkante āyasmante sārīputte kālamakāsi brahmalokaṃ upapajji . atha kho bhagavā bhikkhū āmantesi eso bhikkhave sārīputto dhanañjāniṃ brāhmaṇaṃ sati uttarikaraṇīye hīne brahmaloke patiṭṭhāpetvā uṭṭhāyāsanā pakkantoti.

[703] Atha kho āyasmā sārīputto yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho āyasmā sārīputto bhagavantaṃ etadavoca dhanañjāni bhante brāhmaṇo ābādhiko dukkhito bāḷhagilāno so bhagavato pāde sirasā vandatīti . kiṃ pana tvaṃ sārīputta dhanañjāniṃ brāhmaṇaṃ sati uttarikaraṇīye hīne brahmaloke patiṭṭhāpetvā uṭṭhāyāsanā pakkantoti . mayhaṃ kho bhante evaṃ ahosi ime kho brāhmaṇā brahmalokādhimuttā yannūnāhaṃ dhanañjānissa Brāhmaṇassa brahmānaṃ sahabyatāya maggaṃ deseyyanti . kālakatova sārīputta dhanañjāni brāhmaṇo brahmaloke upapannoti . Dhanañjānisuttaṃ niṭṭhitaṃ sattamaṃ. ----------