[740] So kho ahaṃ bhāradvāja kiṃkusalagavesī anuttaraṃ santivarapadaṃ pariyesamāno magadhesu anupubbena cārikaṃ caramāno yena uruvelā senānigamo tadavasari . tatthaddasaṃ ramaṇīyaṃ bhūmibhāgaṃ pāsādikañca vanasaṇḍaṃ nadiñca sandantiṃ sītūdakaṃ supatitthaṃ ramaṇīyaṃ Samantā gocaragāmaṃ . tassa mayhaṃ bhāradvāja etadahosi ramaṇīyo vata bhūmibhāgo pāsādiko ca vanasaṇḍo nadī ca sandantī sītūdakā supatitthā ramaṇīyā samantā ca gocaragāmo alaṃ vatidaṃ kulaputtassa padhānatthikassa padhānāyāti . so kho ahaṃ bhāradvāja tattheva nisīdiṃ alamidaṃ padhānāyāti.

[741] Apissu maṃ bhāradvāja tisso upamā paṭibhaṃsu anacchariyā pubbe assutapubbā . seyyathāpi bhāradvāja allaṃ kaṭṭhaṃ sasnehaṃ udake nikkhittaṃ . atha puriso āgaccheyya uttarāraṇiṃ ādāya aggiṃ abhinibbattessāmi tejo pātukarissāmīti . taṃ kiṃ maññasi bhāradvāja api nu so puriso amuṃ allaṃ kaṭṭhaṃ sasnehaṃ udake nikkhittaṃ uttarāraṇiṃ ādāya abhimatthento aggiṃ abhinibbatteyya tejo pātukareyyāti . no hidaṃ bho gotama taṃ kissa hetu aduñhi bho gotama allaṃ kaṭṭhaṃ sasnehaṃ tañca pana udake nikkhittaṃ yāvadeva ca pana so puriso kilamathassa vighātassa bhāgī assāti. {741.1} Evameva kho bhāradvāja ye hi keci samaṇā vā brāhmaṇā vā kāyena ceva kāmehi avūpakaṭṭhā viharanti . Yo ca nesaṃ kāmesu kāmacchando kāmasneho kāmamucchā kāmapipāsā kāmapariḷāho so ca ajjhattaṃ na supahīno hoti na supaṭippassaddho . opakkamikā cepi te bhonto samaṇabrāhmaṇā dukkhā tippā kaṭukā vedanā vediyanti abhabbāva te ñāṇāya dassanāya anuttarāya sambodhāya . no cepi Te bhonto samaṇabrāhmaṇā opakkamikā dukkhā tippā kaṭukā vedanā vediyanti abhabbāva te ñāṇāya dassanāya anuttarāya sambodhāya . ayaṃ kho maṃ bhāradvāja paṭhamā upamā paṭibhāsi anacchariyā pubbe assutapubbā.