[81] Bhūtapubbaṃ bhante aññatarassa brāhmaṇassa jiṇṇassa vuḍḍhassa mahallakassa daharā māṇavikā pajāpatī ahosi gabbhinī upavijaññā . atha kho bhante sā māṇavikā taṃ brāhmaṇaṃ etadavoca gaccha tvaṃ brāhmaṇa āpaṇā makkaṭacchāpakaṃ kīṇitvā ānehi yo me kumārakassa kīḷāpanako bhavissatīti . evaṃ vutte bhante so brāhmaṇo taṃ māṇavikaṃ etadavoca āgamehi tāva bhoti yāva vijāyasi sace tvaṃ bhoti kumārakaṃ vijāyissasi tassā te ahaṃ āpaṇā makkaṭacchāpakaṃ kīṇitvā ānissāmi yo te kumārakassa kīḷāpanako bhavissati sace pana tvaṃ bhoti kumārikaṃ vijāyissasi tassā te ahaṃ āpaṇā makkaṭacchāpikaṃ kīṇitvā ānissāmi yā te kumārikāya kīḷāpanikā bhavissatīti . dutiyampi kho bhante sā māṇavikā taṃ brāhmaṇaṃ etadavoca gaccha tvaṃ brāhmaṇa āpaṇā makkaṭacchāpakaṃ kīṇitvā ānehi yo me kumārakassa kīḷāpanako bhavissatīti . dutiyampi kho bhante so Brāhmaṇo taṃ māṇavikaṃ etadavoca āgamehi tāva bhoti yāva vijāyasi sace tvaṃ bhoti kumārakaṃ vijāyissasi tassā te ahaṃ āpaṇā makkaṭacchāpakaṃ kīṇitvā ānissāmi yo te kumārakassa kīḷāpanako bhavissati sace pana tvaṃ bhoti kumārikaṃ vijāyissasi tassā te ahaṃ āpaṇā makkaṭacchāpikaṃ kīṇitvā ānissāmi yā te kumārikāya kīḷāpanikā bhavissatīti. {81.1} Tatiyampi kho bhante sā māṇavikā taṃ brāhmaṇaṃ etadavoca gaccha tvaṃ brāhmaṇa āpaṇā makkaṭacchāpadaṃ kīṇitvā ānehi yo me kumārakassa kīḷāpanako bhavissatīti . atha kho bhante so brāhmaṇo tassā māṇavikāya sāratto paṭibaddhacitto āpaṇā makkaṭacchāpakaṃ kīṇitvā ānetvā taṃ māṇavikaṃ etadavoca ayaṃ te bhoti mayā āpaṇā makkaṭacchāpako kīṇitvā ānīto yo te kumārakassa kīḷāpanako bhavissatīti . evaṃ vutte bhante sā māṇavikā taṃ brāhmaṇaṃ etadavoca gaccha tvaṃ brāhmaṇa imaṃ makkaṭacchāpakaṃ ādāya yena rattapāṇī rajakaputto tenupasaṅkami upasaṅkamitvā rattapāṇiṃ rajakaputtaṃ evaṃ vadehi icchāmahaṃ samma rattapāṇi imaṃ makkaṭacchāpakaṃ pītāvalepanaṃ nāma raṅgajātaṃ rajitaṃ ākoṭṭitapaccākoṭṭitaṃ ubhatobhāgavimaṭṭhanti. {81.2} Atha kho bhante so brāhmaṇo tassā māṇavikāya sāratto paṭibaddhacitto makkaṭacchāpakaṃ ādāya yena Rattapāṇī rajakaputto tenupasaṅkami upasaṅkamitvā rattapāṇiṃ rajakaputtaṃ etadavoca icchāmahaṃ samma rattapāṇi imaṃ makkaṭacchāpakaṃ pītāvalepanaṃ nāma raṅgajātaṃ rajitaṃ ākoṭṭitapaccākoṭṭitaṃ ubhatobhāgavimaṭṭhanti. {81.3} Evaṃ vutte bhante rattapāṇī rajakaputto taṃ brāhmaṇaṃ etadavoca ayaṃ kho te bhante makkaṭacchāpako raṅgakkhamo hi kho no ākoṭṭanakkhamo no vimajjanakkhamoti . evameva kho bhante bālānaṃ niganthānaṃ vādo raṅgakkhamo hi kho bālānaṃ no paṇḍitānaṃ no anuyogakkhamo no vimajjanakkhamo . atha kho bhante so brāhmaṇo aparena samayena navaṃ dussayugaṃ ādāya yena rattapāṇī rajakaputto tenupasaṅkami upasaṅkamitvā rattapāṇiṃ rajakaputtaṃ etadavoca icchāmahaṃ samma rattapāṇi imaṃ navaṃ dussayugaṃ pītāvalepanaṃ nāma raṅgajātaṃ rajitaṃ ākoṭṭitapaccākoṭṭitaṃ ubhatobhāgavimaṭṭhanti. {81.4} Evaṃ vutte bhante rattapāṇī rajakaputto brāhmaṇaṃ etadavoca idaṃ kho te bhante navaṃ dussayugaṃ raṅgakkhamañceva ākoṭṭanakkhamañca vimajjanakkhamañcāti . evameva kho bhante tassa bhagavato vādo arahato sammāsambuddhassa raṅgakkhamo ceva paṇḍitānaṃ no bālānaṃ anuyogakkhamo ca vimajjanakkhamo cāti . Sarājikā kho taṃ gahapati parisā evaṃ jānāti upāli gahapati niganthassa nāṭaputtassa sāvakoti kassa taṃ gahapati sāvakaṃ dhāremāti.