[106] Tatra gahapatayo ye te samaṇabrāhmaṇā evaṃvādino evaṃdiṭṭhino natthi dinnaṃ natthi yiṭṭhaṃ natthi hutaṃ .pe. ye imañca lokaṃ parañca lokaṃ sayaṃ abhiññā sacchikatvā pavedentīti tesametaṃ pāṭikaṅkhaṃ yamidaṃ kāyasucaritaṃ vacīsucaritaṃ manosucaritaṃ ime tayo kusale dhamme abhinibbajjetvā yamidaṃ kāyaduccaritaṃ vacīduccaritaṃ manoduccaritaṃ ime tayo akusale dhamme samādāya vattissanti taṃ kissa hetu na hi te bhonto samaṇabrāhmaṇā passanti akusalānaṃ dhammānaṃ ādīnavaṃ okāraṃ saṅkilesaṃ kusalānaṃ dhammānaṃ nekkhamme ānisaṃsaṃ vodānapakkhaṃ. {106.1} Santaṃyeva kho pana paraṃ lokaṃ natthi paro lokotissa diṭṭhi hoti sāssa hoti micchādiṭṭhi . santaṃyeva kho pana paraṃ lokaṃ natthi paro lokoti saṅkappeti svāssa hoti micchāsaṅkappo . Santaṃyeva kho pana paraṃ lokaṃ natthi paro lokoti vācaṃ bhāsati sāssa hoti micchāvācā . santaṃyeva kho pana paraṃ lokaṃ natthi paro lokoti āha ye te arahanto paralokaviduno tesamayaṃ paccanīkaṃ karoti . santaṃyeva kho pana paraṃ lokaṃ natthi paro lokoti Paraṃ saññapeti sāssa hoti asaddhammasaññatti tāya ca pana asaddhammasaññattiyā attānukkaṃseti paraṃ vambheti. {106.2} Iti pubbeva kho panassa susīlyaṃ pahīnaṃ hoti dussīlyaṃ paccupaṭṭhitaṃ ayañca micchādiṭṭhi micchāsaṅkappo micchāvācā ariyānaṃ paccanīkatā asaddhammasaññatti attukkaṃsanā paravambhanā . evaṃsime aneke pāpakā akusalā dhammā sambhavanti micchādiṭṭhipaccayā.
[107] Tatra gahapatayo viññū puriso iti paṭisañcikkhati sace kho natthi paro loko evamayaṃ bhavaṃ purisapuggalo kāyassa bhedā parammaraṇā sotthimattānaṃ karissati sace kho atthi paro loko evamayaṃ bhavaṃ purisapuggalo kāyassa bhedā parammaraṇā apāyaṃ duggatiṃ vinipātaṃ nirayaṃ upapajjissati . kāmaṃ kho pana māhu paro loko hotu nesaṃ bhavataṃ samaṇabrāhmaṇānaṃ saccaṃ vacanaṃ atha ca panāyaṃ bhavaṃ purisapuggalo diṭṭheva dhamme viññūnaṃ gārayho dussīlo purisapuggalo micchādiṭṭhī natthikavādoti. {107.1} Sace kho attheva paro loko evaṃ imassa bhoto purisapuggalassa ubhayattha kaliggāho yañca diṭṭheva dhamme viññūnaṃ gārayho yañca kāyassa bhedā parammaraṇā apāyaṃ duggatiṃ vinipātaṃ nirayaṃ upapajjissati . evamassāyaṃ apaṇṇako dhammo dussamatto samādinno ekaṃsaṃ pharitvā tiṭṭhati riñcati kusalaṭṭhānaṃ.