[114] Tatra gahapatayo viññū puriso iti paṭisañcikkhati sace kho atthi kiriyā evamayaṃ bhavaṃ purisapuggalo kāyassa bhedā parammaraṇā sugatiṃ saggaṃ lokaṃ upapajjissati . kāmaṃ kho pana Māhu kiriyā hotu nesaṃ bhavataṃ samaṇabrāhmaṇānaṃ saccaṃ vacanaṃ atha ca panāyaṃ bhavaṃ purisapuggalo diṭṭheva dhamme viññūnaṃ pāsaṃso sīlavā purisapuggalo sammādiṭṭhī kiriyavādoti . sace kho attheva kiriyā evaṃ imassa bhoto purisapuggalassa ubhayattha kaṭaggāho yañca diṭṭheva dhamme viññūnaṃ pāsaṃso yañca kāyassa bhedā parammaraṇā sugatiṃ saggaṃ lokaṃ upapajjissati . evamassāyaṃ apaṇṇako dhammo susamatto samādinno ubhayaṃsaṃ pharitvā tiṭṭhati riñcati akusalaṭṭhānaṃ.

[115] Santi gahapatayo eke samaṇabrāhmaṇā evaṃvādino evaṃdiṭṭhino natthi hetu natthi paccayo sattānaṃ saṅkilesāya ahetū appaccayā sattā saṅkilissanti natthi hetu natthi paccayo sattānaṃ visuddhiyā ahetū appaccayā sattā visujjhanti natthi balaṃ natthi viriyaṃ natthi purisathāmo natthi purisaparakkamo sabbe sattā sabbe pāṇā sabbe bhūtā sabbe jīvā avasā abalā aviriyā niyatisaṅgatibhāvapariṇatā chasvevābhijātīsu sukhadukkhaṃ paṭisaṃvedentīti tesaṃyeva kho gahapatayo samaṇabrāhmaṇānaṃ eke samaṇabrāhmaṇā ujuvipaccanīkavādā te evamāhaṃsu atthi hetu atthi paccayo sattānaṃ saṅkilesāya sahetū sappaccayā sattā saṅkilissanti atthi hetu atthi paccayo sattānaṃ visuddhiyā sahetū sappaccayā sattā visujjhanti atthi balaṃ atthi viriyaṃ Atthi purisathāmo atthi purisaparakkamo sabbe sattā sabbe pāṇā sabbe bhūtā sabbe jīvā savasā sabalā saviriyā niyatisaṅgatibhāvapariṇatā chasvevābhijātīsu sukhadukkhaṃ paṭisaṃvedentīti . Taṃ kiṃ maññatha gahapatayo nanume samaṇabrāhmaṇā aññamaññaṃ ujuvipaccanīkavādāti. Evaṃ bhante.

[116] Tatra gahapatayo ye te samaṇabrāhmaṇā evaṃvādino evaṃdiṭṭhino natthi hetu natthi paccayo sattānaṃ saṅkilesāya ahetū appaccayā sattā saṅkilissanti natthi hetu natthi paccayo sattānaṃ visuddhiyā ahetū appaccayā sattā visujjhanti natthi balaṃ natthi viriyaṃ natthi purisathāmo natthi purisaparakkamo sabbe sattā sabbe pāṇā sabbe bhūtā sabbe jīvā avasā abalā aviriyā niyatisaṅgatibhāvapariṇatā chasvevābhijātīsu sukhadukkhaṃ paṭisaṃvedentīti tesametaṃ pāṭikaṅkhaṃ yamidaṃ kāyasucaritaṃ vacīsucaritaṃ manosucaritaṃ ime tayo kusale dhamme abhinibbajjetvā yamidaṃ kāyaduccaritaṃ vacīduccaritaṃ manoduccaritaṃ ime tayo akusale dhamme samādāya vattissanti taṃ kissa hetu na hi te bhonto samaṇabrāhmaṇā passanti akusalānaṃ dhammānaṃ ādīnavaṃ okāraṃ saṅkilesaṃ kusalānaṃ dhammānaṃ nekkhamme ānisaṃsaṃ vodānapakkhaṃ . Santaṃyeva kho pana hetuṃ natthi hetūtissa diṭṭhi hoti sāssa hoti micchādiṭṭhi . santaṃyeva kho pana hetuṃ natthi hetūti Saṅkappeti svāssa hoti micchāsaṅkappo . santaṃyeva kho pana hetuṃ natthi hetūti vācaṃ bhāsati sāssa hoti micchāvācā . Santaṃyeva kho pana hetuṃ natthi hetūti āha ye te arahanto hetuvādā tesamayaṃ paccanīkaṃ karoti . santaṃyeva kho pana hetuṃ natthi hetūti paraṃ saññapeti sāssa hoti asaddhammasaññatti tāya ca pana asaddhammasaññattiyā attānukkaṃseti paraṃ vambheti. {116.1} Iti pubbeva kho panassa susīlyaṃ pahīnaṃ hoti dussīlyaṃ paccupaṭṭhitaṃ ayañca micchādiṭṭhi micchāsaṅkappo micchāvācā ariyānaṃ paccanīkatā asaddhammasaññatti attānukkaṃsanā paravambhanā . evaṃsime aneke pāpakā akusalā dhammā sambhavanti micchādiṭṭhipaccayā.