[149] Kinnu kho tāhaṃ māluṅkyaputta evaṃ avacaṃ ehi tvaṃ māluṅkyaputta mayi brahmacariyaṃ cara ahante byākarissāmi sassato lokoti vā asassato lokoti vā antavā lokoti vā anantavā lokoti vā taṃ jīvaṃ taṃ sarīranti vā aññaṃ jīvaṃ aññaṃ sarīranti vā hoti tathāgato parammaraṇāti vā na Hoti tathāgato parammaraṇāti vā hoti ca na ca hoti tathāgato parammaraṇāti vā neva hoti na na hoti tathāgato parammaraṇāti vāti . no hetaṃ bhante . tvaṃ vā pana maṃ evaṃ avaca ahaṃ bhante bhagavati brahmacariyaṃ carissāmi bhagavā me byākarissati sassato lokoti vā asassato lokoti vā antavā lokoti vā anantavā lokoti vā taṃ jīvaṃ taṃ sarīranti vā aññaṃ jīvaṃ aññaṃ sarīranti vā hoti tathāgato parammaraṇāti vā na hoti tathāgato parammaraṇāti vā hoti ca na ca hoti tathāgato parammaraṇāti vā neva hoti na na hoti tathāgato parammaraṇāti vāti. No hetaṃ bhante. {149.1} Iti kira māluṅkyaputta nevāhantaṃ vadāmi ehi tvaṃ māluṅkyaputta mayi brahmacariyaṃ cara ahante byākarissāmi sassato lokoti vā asassato lokoti vā .pe. Neva hoti na na hoti tathāgato parammaraṇāti vāti napi kira tvaṃ vadesi ahaṃ bhante bhagavati brahmacariyaṃ carissāmi bhagavā me byākarissati sassato lokoti vā asassato lokoti vā .pe. neva hoti na na hoti tathāgato parammaraṇāti vāti evaṃ sante moghapurisa ko santo kaṃ paccācikkhasi.

[150] Yo kho māluṅkyaputta evaṃ vadeyya na tāvāhaṃ bhagavati brahmacariyaṃ carissāmi yāva me bhagavā na byākarissati sassato lokoti vā asassato lokoti vā .pe. hoti ca Na ca hoti tathāgato parammaraṇāti vā neva hoti na na hoti tathāgato parammaraṇāti vāti abyākatameva taṃ māluṅkyaputta tathāgatena assa atha kho so puggalo kālaṃ kareyya. {150.1} Seyyathāpi māluṅkyaputta puriso sallena viddho assa savisena gāḷhapalepanena tassa mittāmaccā ñātisālohitā bhisakkaṃ sallakattaṃ upaṭṭhapeyyuṃ . so evaṃ vadeyya na tāvāhaṃ imaṃ sallaṃ āharissāmi yāva na taṃ purisaṃ jānāmi yenamhi viddho khattiyo vā brāhmaṇo vā vesso vā suddo vāti . so evaṃ vadeyya na tāvāhaṃ imaṃ sallaṃ āharissāmi yāva na taṃ purisaṃ jānāmi yenamhi viddho evaṃnāmo evaṃgotto iti vāti . so evaṃ vadeyya na tāvāhaṃ imaṃ sallaṃ āharissāmi yāva na taṃ purisaṃ jānāmi yenamhi viddho dīgho vā rasso vā majjhimo vāti . So evaṃ vadeyya na tāvāhaṃ imaṃ sallaṃ āharissāmi yāva na taṃ purisaṃ jānāmi yenamhi viddho kāḷo vā sāmo vā maṅguracchavī vāti . so evaṃ vadeyya na tāvāhaṃ imaṃ sallaṃ āharissāmi yāva na taṃ purisaṃ jānāmi yenamhi viddho asukasmiṃ gāme vā nigame vā nagare vāti . so evaṃ vadeyya na tāvāhaṃ imaṃ sallaṃ āharissāmi yāva na taṃ dhanuṃ jānāmi yenamhi viddho yadi vā cāpo yadi vā kodaṇḍoti . so evaṃ vadeyya na tāvāhaṃ imaṃ sallaṃ āharissāmi yāva na taṃ jiyaṃ jānāmi yāyamhi Viddho yadi vā akkassa yadi vā saṇṭhassa yadi vā nahārussa yadi vā maruvāya yadi vā khīrapaṇṇinoti . so evaṃ vadeyya na tāvāhaṃ imaṃ sallaṃ āharissāmi yāva na taṃ kaṇḍaṃ jānāmi yenamhi viddho yadi vā gacchaṃ yadi vā ropimanti. {150.2} So evaṃ vadeyya na tāvāhaṃ imaṃ sallaṃ āharissāmi yāva na taṃ kaṇḍaṃ jānāmi yenamhi viddho yassa pattehi vājitaṃ yadi vā gijjhassa yadi vā kaṅkhassa yadi vā kulalassa yadi vā morassa yadi vā sithilahanunoti . so evaṃ vadeyya na tāvāhaṃ imaṃ sallaṃ āharissāmi yāva na taṃ kaṇḍaṃ jānāmi yenamhi viddho yassa nahārunā parikkhittaṃ yadi vā gavassa yadi vā mahisassa yadi vā roruvassa yadi vā semhārassāti . so evaṃ vadeyya na tāvāhaṃ imaṃ sallaṃ āharissāmi yāva na taṃ kaṇḍaṃ jānāmi yenamhi viddho yadi vā sallaṃ yadi vā khurappaṃ yadi vā vekaṇṇaṃ yadi vā nārācaṃ yadi vā vacchadantaṃ yadi vā karavīrapattanti aññātameva taṃ māluṅkyaputta tena purisena assa atha kho so puriso kālaṃ kareyya. {150.3} Evameva kho māluṅkyaputta yo evaṃ vadeyya na tāvāhaṃ bhagavati brahmacariyaṃ carissāmi yāva taṃ me bhagavā na byākarissati sassato lokoti vā asassato Lokoti vā antavā lokoti vā anantavā lokoti vā taṃ jīvaṃ taṃ sarīranti vā aññaṃ jīvaṃ aññaṃ sarīranti vā hoti tathāgato parammaraṇāti vā na hoti tathāgato parammaraṇāti vā hoti ca na ca hoti tathāgato parammaraṇāti vā neva hoti na na hoti tathāgato parammaraṇāti vāti abyākatameva taṃ māluṅkyaputta tathāgatena assa atha kho so puggalo kālaṃ kareyya.