[152] Tasmātiha māluṅkyaputta abyākatañca me abyākatato Dhāretha byākatañca me byākatato dhāretha . kiñca māluṅkyaputta mayā abyākataṃ sassato lokoti māluṅkyaputta mayā abyākataṃ asassato lokoti māluṅkyaputta mayā abyākataṃ antavā lokoti māluṅkyaputta mayā abyākataṃ anantavā lokoti māluṅkyaputta mayā abyākataṃ taṃ jīvaṃ taṃ sarīranti mayā abyākataṃ aññaṃ jīvaṃ aññaṃ sarīranti mayā abyākataṃ hoti tathāgato parammaraṇāti mayā abyākataṃ na hoti tathāgato parammaraṇāti mayā abyākataṃ hoti ca na ca hoti tathāgato parammaraṇāti mayā abyākataṃ neva hoti na na hoti tathāgato parammaraṇāti mayā abyākataṃ. {152.1} Kasmā cetaṃ māluṅkyaputta mayā abyākataṃ na hetaṃ māluṅkyaputta atthasañhitaṃ nādibrahmacariyakaṃ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati tasmā taṃ mayā abyākataṃ . kiñca māluṅkyaputta mayā byākataṃ idaṃ dukkhanti māluṅkyaputta mayā byākataṃ ayaṃ dukkhasamudayoti mayā byākataṃ ayaṃ dukkhanirodhoti mayā byākataṃ ayaṃ dukkhanirodhagāminī paṭipadāti mayā byākataṃ. {152.2} Kasmā cetaṃ māluṅkyaputta mayā byākataṃ etañhi māluṅkyaputta atthasañhitaṃ etaṃ ādibrahmacariyakaṃ etaṃ nibbidāya virāgāya nirodhāya upasamāya abhiññāya sambodhāya nibbānāya saṃvattati tasmā taṃ mayā byākataṃ . tasmātiha māluṅkyaputta abyākatañca Me abyākatato dhāretha byākatañca me byākatato dhārethāti. Idamavoca bhagavā attamano āyasmā māluṅkyaputto bhagavato bhāsitaṃ abhinandīti. Cūḷamāluṅkyovādasuttaṃ niṭṭhitaṃ tatiyaṃ. -----------