[171] Idha bhaddāli ekacco bhikkhu saddhāmattakena vahati pemamattakena . tatra bhaddāli bhikkhūnaṃ evaṃ hoti ayaṃ kho āvuso bhikkhu saddhāmattakena vahati pemamattakena sace mayaṃ imaṃ bhikkhuṃ pavayha pavayha kāraṇaṃ kāressāma mā yampissa taṃ saddhāmattakaṃ pemamattakaṃ tamhāpi parihāyīti . seyyathāpi bhaddāli purisassa ekaṃ cakkhuṃ tassa mittāmaccā ñātisālohitā taṃ ekaṃ cakkhuṃ rakkheyyuṃ mā yampissa taṃ ekaṃ cakkhuṃ tamhāpi parihāyīti evameva kho bhaddāli idhekacco bhikkhu saddhāmattakena vahati pemamattakena . tatra bhaddāli bhikkhūnaṃ evaṃ hoti ayaṃ kho āvuso bhikkhu saddhāmattakena vahati pemamattakena sace mayaṃ imaṃ bhikkhuṃ pavayha pavayha kāraṇaṃ kāressāma mā yampissa taṃ saddhāmattakaṃ pemamattakaṃ tamhāpi parihāyīti . ayaṃ kho bhaddāli hetu ayaṃ paccayo yenamidhekaccaṃ bhikkhuṃ pavayha pavayha kāraṇaṃ kārenti ayaṃ pana bhaddāli hetu ayaṃ paccayo yenamidhekaccaṃ bhikkhuṃ na tathā pavayha pavayha kāraṇaṃ kārentīti . {171.1} Ko nu kho bhante hetu ko paccayo yena pubbe appatarāni ceva sikkhāpadāni ahesuṃ bahutarā ca bhikkhū aññāya saṇṭhahiṃsu ko pana bhante hetu ko paccayo yenetarahi bahutarāni ceva sikkhāpadāni ahesuṃ appatarā ca bhikkhū aññāya saṇṭhahantīti.

[172] Evañhetaṃ bhaddāli hoti sattesu hāyamānesu Saddhamme antaradhāyamāne bahutarāni ceva sikkhāpadāni honti appatarā ca bhikkhū aññāya saṇṭhahanti . na tāva bhaddāli satthā sāvakānaṃ sikkhāpadaṃ paññāpeti yāva na idhekacce āsavaṭṭhānīyā dhammā saṅghe pātubhavanti. {172.1} Yato ca kho bhaddāli idhekacce āsavaṭṭhānīyā dhammā saṅghe pātubhavanti atha satthā sāvakānaṃ sikkhāpadaṃ paññāpeti tesaṃyeva āsavaṭṭhānīyānaṃ dhammānaṃ paṭighātāya . na tāva bhaddāli idhekacce āsavaṭṭhānīyā dhammā saṅghe pātubhavanti yāva na saṅgho mahattaṃ patto hoti . yato ca kho bhaddāli saṅgho mahattaṃ patto hoti atha idhekacce āsavaṭṭhānīyā dhammā saṅghe pātubhavanti atha satthā sāvakānaṃ sikkhāpadaṃ paññāpeti tesaṃyeva āsavaṭṭhānīyānaṃ dhammānaṃ paṭighātāya . na tāva bhaddāli idhekacce āsavaṭṭhānīyā dhammā saṅghe pātubhavanti yāva na saṅgho lābhaggaṃ patto hoti ... Yasaggaṃ patto hoti ... bāhusaccaṃ patto hoti ... Rattaññutaṃ patto hoti. Yato ca kho bhaddāli saṅgho rattaññutaṃ patto hoti atha idhekacce āsavaṭṭhānīyā dhammā saṅghe pātubhavanti atha satthā sāvakānaṃ sikkhāpadaṃ paññāpeti tesaṃyeva āsavaṭṭhānīyānaṃ dhammānaṃ paṭighātāya.