[51] Evamme sutaṃ ekaṃ samayaṃ bhagavā sakkesu viharati sāmagāme . tena kho pana samayena nigantho nāṭaputto pāvāyaṃ adhunā kālakato hoti . tassa kālakiriyāya bhinnā niganthā dveḷhakajātā bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti na tvaṃ imaṃ dhammavinayaṃ ājānāsi ahaṃ imaṃ dhammavinayaṃ ājānāmi kiṃ tvaṃ imaṃ dhammavinayaṃ ājānissasi micchāpaṭipanno tvamasi ahamasmi sammāpaṭipanno sahitamme asahitante pure vacanīyaṃ pacchā avaca pacchā vacanīyaṃ pure avaca adhiciṇṇaṃ te viparāvattaṃ āropito te vādo niggahitopi cara vādappamokkhāya nibbedhehi vā sace pahosīti . te aññamaññaṃ kalahaṃ kariṃsu . vadhoyeveko maññe niganthesu nāṭaputtiyesu vattati. Yepi niganthassa nāṭaputtassa sāvakā gihī odātavasanā . tepi niganthesu nāṭaputtiyesu nibbindarūpā virattarūpā paṭivānarūpā yathātaṃ durakkhāte dhammavinaye duppavedite aniyyānike anupasamasaṃvattanike asammāsambuddhappavedite bhinnathūpe appaṭisaraṇe.

[52] Atha kho cundo samaṇuddeso pāvāyaṃ vassaṃ vuttho yena sāmagāmo yenāyasmā ānando tenupasaṅkami upasaṅkamitvā āyasmantaṃ ānandaṃ abhivādetvā ekamantaṃ nisīdi . ekamantaṃ Nisinno kho cundo samaṇuddeso āyasmantaṃ ānandaṃ etadavoca nigantho bhante nāṭaputto pāvāyaṃ adhunā kālakato tassa kālakiriyāya bhinnā niganthā dveḷhakajātā .pe. bhinnathūpe appaṭisaraṇeti . evaṃ vutte āyasmā ānando cundaṃ samaṇuddesaṃ etadavoca atthi kho idaṃ āvuso cunda kathāpābhaṭaṃ bhagavantaṃ dassanāya āyāmāvuso cunda yena bhagavā tenupasaṅkamissāma upasaṅkamitvā etamatthaṃ bhagavato ārocessāmāti . evaṃ bhanteti kho cundo samaṇuddeso āyasmato ānandassa paccassosi.

[53] Atha kho āyasmā ca ānando cundo ca samaṇuddeso yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ nisinno kho āyasmā ānando bhagavantaṃ etadavoca ayaṃ bhante cundo samaṇuddeso evamāha nigantho bhante nāṭaputto pāvāyaṃ adhunā kālakato tassa kālakiriyāya bhinnā niganthā dveḷhakajātā bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti na tvaṃ imaṃ dhammavinayaṃ ājānāsi ahaṃ imaṃ dhammavinayaṃ ājānāmi .pe. Bhinnathūpe appaṭisaraṇeti tassa mayhaṃ bhante evaṃ hoti mā heva bhagavato accayena saṅghe vivādo uppajji svāssa vivādo bahujanāhitāya bahujanāsukhāya bahuno janassa anatthāya ahitāya dukkhāya devamanussānanti.