[272] Katamo ca bhikkhave sammākammanto sāsavo puññabhāgiyo upadhivepakko . atthi bhikkhave pāṇātipātā veramaṇī adinnādānā veramaṇī kāmesumicchācārā veramaṇī ayaṃ bhikkhave sammākammanto sāsavo puññabhāgiyo upadhivepakko.

[273] Katamo ca bhikkhave sammākammanto ariyo anāsavo lokuttaro maggaṅgo . yā kho bhikkhave ariyacittassa anāsavacittassa ariyamaggasamaṅgino ariyamaggaṃ bhāvayato tīhipi kāyaduccaritehi ārati virati paṭivirati veramaṇī ayaṃ bhikkhave sammākammanto ariyo anāsavo lokuttaro maggaṅgo . so micchākammantassa pahānāya vāyamati sammākammantassa upasampadāya . svāssa hoti sammāvāyāmo . so sato micchākammantaṃ pajahati sato sammākammantaṃ upasampajja viharati . sāssa hoti sammāsati . Itissime tayo dhammā sammākammantaṃ anuparidhāvanti anuparivattanti seyyathīdaṃ sammādiṭṭhi sammāvāyāmo sammāsati.

[274] Tatra bhikkhave sammādiṭṭhi pubbaṅgamā hoti . kathañca bhikkhave sammādiṭṭhi pubbaṅgamā hoti . micchāājīvaṃ micchāājīvoti pajānāti sammāājīvaṃ sammāājīvoti pajānāti . Sāssa hoti sammādiṭṭhi.

[275] Katamo ca bhikkhave micchāājīvo . kuhanā lapanā nemittakatā nippesikatā lābhena lābhaṃ nijigiṃsanatā ayaṃ bhikkhave micchāājīvo.