[312] Seyyathāpi bhikkhave allaṃ kaṭṭhaṃ sasnehaṃ . atha puriso āgaccheyya uttarāraṇiṃ ādāya aggiṃ abhinibbattessāmi tejodhātuṃ karissāmīti . taṃ kiṃ maññatha bhikkhave api nu so puriso amuṃ allaṃ kaṭṭhaṃ sasnehaṃ uttarāraṇiṃ ādāya abhimatthento aggiṃ abhinibbatteyya tejodhātuṃ kareyyāti . no hetaṃ bhante. Evameva kho bhikkhave yassakassaci kāyagatā sati bhāvitā bahulīkatā na tassa labhati māro otāraṃ na tassa labhati māro ārammaṇaṃ.

[313] Seyyathāpi bhikkhave udakamaṇiko pūro udakassa samatittiko kākapeyyo ādhāre ṭhapito . atha puriso āgaccheyya udakabhāraṃ ādāya . taṃ kiṃ maññatha bhikkhave api nu so puriso labhetha udakassa nikkhepananti . no hetaṃ bhante . evameva kho bhikkhave yassakassaci kāyagatā sati bhāvitā bahulīkatā na tassa labhati māro otāraṃ na tassa labhati māro ārammaṇaṃ.

[314] Yassakassaci bhikkhave kāyagatā sati bhāvitā bahulīkatā so yassa yassa abhiññāsacchikaraṇīyassa dhammassa cittaṃ abhininnāmeti abhiññāsacchikiriyāya tatra tatreva sakkhibyataṃ pāpuṇāti sati satiāyatane . seyyathāpi bhikkhave udakamaṇiko pūro udakassa Samatittiko kākapeyyo ādhāre ṭhapito . tamenaṃ balavā puriso yato yato āpajjeyya āgaccheyya udakanti . evaṃ bhante. Evameva kho bhikkhave yassakassaci kāyagatā sati bhāvitā bahulīkatā so yassa yassa abhiññāsacchikaraṇīyassa dhammassa cittaṃ abhininnāmeti abhiññāsacchikiriyāya tatra tatreva sakkhibyataṃ pāpuṇāti sati satiāyatane.

[315] Seyyathāpi bhikkhave same bhūmibhāge caturassā pokkharaṇī [2]- āḷibaddhā pūrā udakassa samatittikā kākapeyyā . tamenaṃ balavā puriso yato yato āḷiṃ paccheyya āgaccheyya udakanti . Evaṃ bhante . evameva kho bhikkhave yassakassaci kāyagatā sati bhāvitā bahulīkatā so yassa yassa abhiññāsacchikaraṇīyassa dhammassa cittaṃ abhininnāmeti abhiññāsacchikiriyāya tatra tatreva sakkhibyataṃ pāpuṇāti sati satiāyatane.