[351] Na kho ānanda arahati sāvako satthāraṃ anubandhituṃ yadidaṃ suttageyyaveyyākaraṇassa sotuṃ taṃ kissa hetu dīgharattassa hi vo ānanda dhammā sutā dhatā vacasā paricitā manasānupekkhitā diṭṭhiyā supaṭividdhā . yā ca kho ayaṃ ānanda kathā abhisallekhikā cetovicāraṇasappāyā ekantanibbidāya virāgāya nirodhāya upasamāya abhiññāya sambodhāya nibbānāya saṃvattati seyyathīdaṃ appicchakathā santuṭṭhikathā pavivekakathā asaṃsaggakathā viriyārambhakathā sīlakathā Samādhikathā paññākathā vimuttikathā vimuttiñāṇadassanakathā evarūpiyā kho ānanda kathāya sotuṃ arahati sāvako satthāraṃ anubandhituṃ apipayujjamānoti . evaṃ sante ānanda ācariyūpaddavo hoti evaṃ sante antevāsūpaddavo hoti evaṃ sante brahmacārūpaddavo hoti.

[352] Kathañcānanda ācariyūpaddavo hoti . idhānanda ekacco satthā vivittaṃ senāsanaṃ bhajati araññaṃ rukkhamūlaṃ pabbataṃ kandaraṃ giriguhaṃ susānaṃ vanapatthaṃ abbhokāsaṃ palālapuñjaṃ . tassa tathāvūpakaṭṭhassa viharato anvāvaṭṭanti brāhmaṇagahapatikā negamā ceva jānapadā ca. So anvāvaṭṭesu brāhmaṇagahapatikesu negamesu ceva jānapadesu ca mucchaṃ nikāmayati gedhaṃ āpajjati āvaṭṭati bāhullāya . Ayaṃ vuccatānanda upaddavo ācariyo ācariyūpaddavena . Avadhiṃsu naṃ pāpakā akusalā dhammā saṅkilesikā ponobbhavikā sadarā dukkhavipākā āyatiṃ jātijarāmaraṇīyā . evaṃ kho ānanda ācariyūpaddavo hoti.

[353] Kathañcānanda antevāsūpaddavo hoti . tasseva kho panānanda satthu sāvako tassa satthu vivekamanubrūhayamāno vivittaṃ senāsanaṃ bhajati araññaṃ rukkhamūlaṃ pabbataṃ kandaraṃ giriguhaṃ susānaṃ vanapatthaṃ abbhokāsaṃ palālapuñjaṃ . tassa tathāvūpakaṭṭhassa viharato anvāvaṭṭanti brāhmaṇagahapatikā negamā ceva jānapadā ca . so Anvāvaṭṭesu brāhmaṇagahapatikesu negamesu ceva jānapadesu ca mucchaṃ nikāmayati gedhaṃ āpajjati āvaṭṭati bāhullāya . ayaṃ vuccatānanda upaddavo antevāsī antevāsūpaddavena . avadhiṃsu naṃ pāpakā akusalā dhammā saṅkilesikā ponobbhavikā sadarā dukkhavipākā āyatiṃ jātijarāmaraṇīyā . evaṃ kho ānanda antevāsūpaddavo hoti.