[375] Sammukhā metaṃ bhante bhagavato sutaṃ sammukhā paṭiggahitaṃ yadā ānanda bodhisatto mātu kucchimhā nikkhamati atha visuddhova nikkhamati amakkhito uddena amakkhito semhena amakkhito ruhirena amakkhito pubbena amakkhito kenaci asucinā suddho visuddho . seyyathāpi ānanda maṇiratanaṃ kāsikavatthe nikkhittaṃ neva maṇiratanaṃ kāsikavatthaṃ makkheti nāpi kāsikavatthaṃ maṇiratanaṃ makkheti taṃ kissa hetu ubhinnaṃ suddhattā evameva kho ānanda yadā bodhisatto mātu kucchimhā nikkhamati visuddho nikkhamati amakkhito uddena amakkhito semhena .pe. amakkhito kenaci asucinā suddho visuddhoti . yampi bhante .pe. idampahaṃ bhante bhagavato acchariyaṃ abbhūtadhammaṃ dhāremi.

[376] Sammukhā metaṃ bhante bhagavato sutaṃ sammukhā paṭiggahitaṃ yadā ānanda bodhisatto mātu kucchimhā nikkhamati dve udakassa dhārā antalikkhā pātubhavanti ekā sītassa ekā uṇhassa yena bodhisattassa udakakiccaṃ karoti mātu cāti . yampi bhante .pe. Idampahaṃ bhante bhagavato acchariyaṃ abbhūtadhammaṃ dhāremi.

[377] Sammukhā metaṃ bhante bhagavato sutaṃ sammukhā paṭiggahitaṃ sampatijāto ānanda bodhisatto samehi pādehi paṭhaviyaṃ patiṭṭhahitvā uttarābhimukho sattapadavītihārena gacchati setamhi chatte anuhīramāne sabbā ca disā viloketi āsabhiñca vācaṃ bhāsati aggohamasmi lokassa jeṭṭhohamasmi lokassa seṭṭhohamasmi lokassa ayamantimā jāti natthidāni punabbhavoti . yampi bhante .pe. idampahaṃ bhante bhagavato acchariyaṃ abbhūtadhammaṃ dhāremi.

[378] Sammukhā metaṃ bhante bhagavato sutaṃ sammukhā paṭiggahitaṃ yadā ānanda bodhisatto mātu kucchimhā nikkhamati atha sadevake loke samārake sabrahmake sassamaṇabrāhmaṇiyā pajāya sadevamanussāya appamāṇo oḷāro obhāso loke pātubhavati atikkammeva devānaṃ devānubhāvaṃ yāpi tā lokantarikā aghā asaṃvutā andhakārā andhakāratimisā yatthapime candimasuriyā evaṃmahiddhikā evaṃmahānubhāvā ābhāya nānubhonti tatthapi appamāṇo oḷāro obhāso loke pātubhavati atikkammeva devānaṃ devānubhāvaṃ yepi Tattha sattā upapannā tepi tenobhāsena aññamaññaṃ sañjānanti aññepi kira bho santi sattā idhūpapannāti ayaṃ kho dasasahassī lokadhātu saṅkampati sampakampati sampavedhati appamāṇo ca oḷāro obhāso loke pātubhavati atikkammeva devānaṃ devānubhāvanti . Yampi bhante .pe. idampahaṃ bhante bhagavato acchariyaṃ abbhūtadhammaṃ dhāremīti.