[385] Labheyyāhaṃ āvuso bakkula imasmiṃ dhammavinaye pabbajjaṃ labheyyaṃ upasampadanti . alattha kho acelo kassapo imasmiṃ dhammavinaye pabbajjaṃ alattha upasampadaṃ . acirūpasampanno kho panāyasmā kassapo eko vūpakaṭṭho appamatto ātāpī pahitatto viharanto na cirasseva yassatthāya kulaputtā sammadeva agārasmā anagāriyaṃ pabbajanti tadanuttaraṃ brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti abbhaññāsi . Aññataro kho panāyasmā kassapo arahataṃ ahosi.

[386] Atha kho āyasmā bakkulo aparena samayena apāpuraṇaṃ ādāya vihārena vihāraṃ upasaṅkamitvā evamāha abhikkamathāyasmanto abhikkamathāyasmanto ajja me parinibbānaṃ bhavissatīti . yampāyasmā bakkulo apāpuraṇaṃ ādāya vihārena vihāraṃ upasaṅkamitvā evamāha abhikkamathāyasmanto abhikkamathāyasmanto ajja me parinibbānaṃ bhavissatīti idampi mayaṃ āyasmato bakkulassa acchariyaṃ abbhūtadhammaṃ dhāremāti.

[387] Atha kho āyasmā bakkulo majjhe bhikkhusaṅghassa nisinnako parinibbāyi . yampāyasmā bakkulo majjhe bhikkhusaṅghassa nisinnako parinibbāyi idampi mayaṃ āyasmato bakkulassa acchariyaṃ abbhūtadhammaṃ dhāremāti. Bakkulattheracchariyabbhūtasuttaṃ niṭṭhitaṃ catutthaṃ. ------------