[401] So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṃ khayañāṇāya cittaṃ abhininnāmeti . so idaṃ dukkhanti yathābhūtaṃ pajānāti ayaṃ dukkhasamudayoti yathābhūtaṃ pajānāti ayaṃ dukkhanirodhoti yathābhūtaṃ pajānāti ayaṃ dukkhanirodhagāminī paṭipadāti yathābhūtaṃ pajānāti . ime āsavāti yathābhūtaṃ pajānāti ayaṃ āsavasamudayoti yathābhūtaṃ pajānāti ayaṃ āsavanirodhoti yathābhūtaṃ pajānāti ayaṃ āsavanirodhagāminī paṭipadāti yathābhūtaṃ pajānāti . Tassa evaṃ jānato evaṃ passato kāmāsavāpi cittaṃ vimuccati bhavāsavāpi cittaṃ vimuccati avijjāsavāpi cittaṃ vimuccati vimuttasmiṃ vimuttamiti ñāṇaṃ hoti khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāti.

[402] So bhikkhu khamo sītassa uṇhassa jighacchāya pipāsāya ḍaṃsamakasavātātapasiriṃsapasamphassānaṃ duruttānaṃ durāgatānaṃ vacanapathānaṃ uppannānaṃ sārīrikānaṃ vedanānaṃ dukkhānaṃ tippānaṃ kharānaṃ kaṭukānaṃ asātānaṃ amanāpānaṃ pāṇaharānaṃ adhivāsikajātiko hoti . Sabbarāgadosamohanihata ninnitakasāvo āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassa.

[403] Mahallako cepi aggivessana rañño nāgo adanto avinīto kālaṃ karoti adantamaraṇaṃ mahallako rañño nāgo mato kālakatotveva saṅkhaṃ gacchati . majjhimo cepi aggivessana rañño nāgo ... daharo cepi aggivessana rañño nāgo adanto avinīto kālaṃ karoti adantamaraṇaṃ daharo rañño nāgo mato kālakatotveva saṅkhaṃ gacchati evameva kho aggivessana thero cepi bhikkhu akhīṇāsavo kālaṃ karoti adantamaraṇaṃ thero bhikkhu mato kālakatotveva saṅkhaṃ gacchati . majjhimo cepi aggivessana bhikkhu ... navo cepi aggivessana bhikkhu akhīṇāsavo kālaṃ karoti adantamaraṇaṃ navo bhikkhu mato kālakatotveva saṅkhaṃ gacchati.

[404] Mahallako cepi aggivessana rañño nāgo sudanto suvinīto kālaṃ karoti dantamaraṇaṃ mahallako rañño nāgo mato kālakatotveva saṅkhaṃ gacchati . majjhimo cepi aggivessana rañño nāgo ... daharo cepi aggivessana rañño nāgo sudanto suvinīto kālaṃ karoti dantamaraṇaṃ daharo rañño nāgo mato kālakatotveva saṅkhaṃ gacchati evameva kho aggivessana thero cepi bhikkhu khīṇāsavo kālaṃ karoti dantamaraṇaṃ thero bhikkhu mato kālakatotveva saṅkhaṃ gacchati . majjhimo cepi aggivessana bhikkhu ... navo cepi aggivessana bhikkhu khīṇāsavo kālaṃ karoti dantamaraṇaṃ navo bhikkhu mato kālakatotveva saṅkhaṃ gacchatīti. Idamavoca bhagavā attamano aciravato samaṇuddeso bhagavato bhāsitaṃ abhinandīti. Dantabhūmisuttaṃ niṭṭhitaṃ pañcamaṃ. --------