[33] Tatra bhikkhave ye te samaṇabrāhmaṇā sato sattassa ucchedaṃ vināsaṃ vibhavaṃ paññāpenti tatra bhikkhave ye te samaṇabrāhmaṇā saññiṃ attānaṃ paññāpenti arogaṃ parammaraṇā tesamete paṭikkosanti yepi te bhonto samaṇabrāhmaṇā asaññiṃ attānaṃ paññāpenti arogaṃ parammaraṇā tesamete paṭikkosanti yepi te bhonto samaṇabrāhmaṇā nevasaññiṃ nāsaññiṃ attānaṃ paññāpenti arogaṃ parammaraṇā tesamete paṭikkosanti taṃ kissa hetu sabbepime bhonto samaṇabrāhmaṇā uddhaṃ parāmasanti āsattiṃyeva abhivadanti iti pecca bhavissāma iti pecca bhavissāmāti . seyyathāpi nāma vānijassa vānijjāya gacchato evaṃ hoti ito me idaṃ bhavissati iminā idaṃ lacchāmīti evameva khome bhonto samaṇabrāhmaṇā vānijūpamaṃ maññe paṭibhanti iti Pecca bhavissāma iti pecca bhavissāmāti. {33.1} Tayidaṃ bhikkhave tathāgato abhijānāti ye kho te bhonto samaṇabrāhmaṇā sato sattassa ucchedaṃ vināsaṃ vibhavaṃ paññāpenti te sakkāyabhayā sakkāyaparijegucchā sakkāyaññeva anuparidhāvanti anuparivattanti . seyyathāpi nāma sā gaddalabandho daḷhe thambhe vā khīle vā upanibandho tameva thambhaṃ vā khīlaṃ vā anuparidhāvati anuparivattati evamevime bhonto samaṇabrāhmaṇā sakkāyabhayā sakkāyaparijegucchā sakkāyaññeva anuparidhāvanti anuparivattanti . tayidaṃ saṅkhataṃ oḷārikaṃ atthi kho pana saṅkhārānaṃ nirodho atthetanti iti viditvā tassa nissaraṇadassāvī tathāgato tadupātivatto.
[34] Ye hi keci bhikkhave samaṇā vā brāhmaṇā vā aparantakappikā aparantānudiṭṭhino aparantaṃ ārabbha anekavihitāni adhimuttipadāni abhivadanti sabbe te imāneva pañcāyatanāni abhivadanti etesaṃ vā aññataraṃ . santi bhikkhave eke samaṇabrāhmaṇā pubbantakappikā pubbantānudiṭṭhino pubbantaṃ ārabbha anekavihitāni adhimuttipadāni abhivadanti. {34.1} Sassato attā ca loko ca idameva saccaṃ moghamaññanti ittheke abhivadanti . assassato attā ca loko ca idameva saccaṃ moghamaññanti ittheke abhivadanti . sassato ca assassato ca attā ca loko ca idameva saccaṃ moghamaññanti ittheke abhivadanti . Nevasassato nāssassato attā ca loko ca idameva saccaṃ moghamaññanti ittheke abhivadanti . antavā attā ca loko ca idameva saccaṃ moghamaññanti ittheke abhivadanti . anantavā attā ca loko ca idameva saccaṃ moghamaññanti ittheke abhivadanti . antavā ca anantavā ca attā ca loko ca idameva saccaṃ moghamaññanti ittheke abhivadanti . nevantavā nānantavā attā ca loko ca idameva saccaṃ moghamaññanti ittheke abhivadanti . ekattasaññī attā ca loko ca idameva saccaṃ moghamaññanti ittheke abhivadanti . nānattasaññī attā ca loko ca idameva saccaṃ moghamaññanti ittheke abhivadanti . Parittasaññī attā ca loko ca idameva saccaṃ moghamaññanti ittheke abhivadanti . appamāṇasaññī attā ca loko ca idameva saccaṃ moghamaññanti ittheke abhivadanti . ekantasukhī attā ca loko ca idameva saccaṃ moghamaññanti ittheke abhivadanti . Ekantadukkhī attā ca loko ca idameva saccaṃ moghamaññanti ittheke abhivadanti . sukhadukkhī attā ca loko ca idameva saccaṃ moghamaññanti ittheke abhivadanti . adukkhamasukhī attā ca loko ca idameva saccaṃ moghamaññanti ittheke abhivadanti.