[422] Yā cāyaṃ gahapati appamāṇā cetovimutti yā ca mahaggatā cetovimutti ime dhammā nānatthā ceva nānābyañjanā Ca tadimināpetaṃ gahapati pariyāyena veditabbaṃ yathā panime dhammā nānatthā ceva nānābyañjanā ca . katamā ca gahapati appamāṇā cetovimutti . idha gahapati bhikkhu mettāsahagatena cetasā ekaṃ disaṃ pharitvā viharati tathā dutiyaṃ tathā tatiyaṃ tathā catutthaṃ iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyāpajjhena pharitvā viharati . karuṇāsahagatena cetasā ... muditāsahagatena cetasā ... upekkhāsahagatena cetasā ekaṃ disaṃ pharitvā viharati tathā dutiyaṃ tathā tatiyaṃ tathā catutthaṃ iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyāpajjhena pharitvā viharati ayaṃ vuccati gahapati appamāṇā cetovimutti.
[423] Katamā ca gahapati mahaggatā cetovimutti . idha gahapati bhikkhu yāvatā ekaṃ rukkhamūlaṃ mahaggatanti pharitvā adhimuccitvā viharati ayaṃ vuccati gahapati mahaggatā cetovimutti . Idha pana gahapati bhikkhu yāvatā dve vā tīṇi vā rukkhamūlāni mahaggatanti pharitvā adhimuccitvā viharati ayaṃ vuccati gahapati mahaggatā cetovimutti . idha gahapati bhikkhu yāvatā ekaṃ gāmakkhettaṃ mahaggatanti pharitvā adhimuccitvā viharati ayaṃ vuccati gahapati mahaggatā cetovimutti . idha pana gahapati bhikkhu yāvatā Dve vā tīṇi vā gāmakkhettāni mahaggatanti pharitvā adhimuccitvā viharati ayaṃ vuccati gahapati mahaggatā cetovimutti . idha gahapati bhikkhu yāvatā ekaṃ mahārajjaṃ mahaggatanti pharitvā adhimuccitvā viharati ayaṃ vuccati gahapati mahaggatā cetovimutti . idha pana gahapati bhikkhu yāvatā dve vā tīṇi vā mahārajjāni mahaggatanti pharitvā adhimuccitvā viharati ayaṃ vuccati gahapati mahaggatā cetovimutti . idha pana gahapati bhikkhu yāvatā samuddapariyantaṃ paṭhaviṃ mahaggatanti pharitvā adhimuccitvā viharati ayaṃ vuccati gahapati mahaggatā cetovimutti . iminā kho etaṃ gahapati pariyāyena veditabbaṃ yathā panime dhammā nānatthā ceva nānābyañjanā ca.