[424] Catasso kho imā gahapati bhavūpapattiyo . katamā catasso . idha gahapati ekacco parittābhāni pharitvā adhimuccitvā viharati . so kāyassa bhedā parammaraṇā parittābhānaṃ devānaṃ sahabyataṃ upapajjati . idha pana gahapati ekacco appamāṇābhāni pharitvā adhimuccitvā viharati . so kāyassa bhedā parammaraṇā appamāṇābhānaṃ devānaṃ sahabyataṃ upapajjati . idha gahapati ekacco saṅkiliṭṭhābhāni pharitvā adhimuccitvā viharati . so kāyassa bhedā parammaraṇā saṅkiliṭṭhābhānaṃ devānaṃ sahabyataṃ upapajjati . idha pana gahapati ekacco parisuddhābhāni pharitvā Adhimuccitvā viharati . so kāyassa bhedā parammaraṇā parisuddhābhānaṃ devānaṃ sahabyataṃ upapajjati . imā kho gahapati catasso bhavūpapattiyo.

[425] Hoti kho so gahapati samayo yā tā devatā ekajjhaṃ sannipatanti tāsaṃ ekajjhaṃ sannipatitānaṃ vaṇṇanānattaṃ hi kho paññāyati no ca ābhānānattaṃ . seyyathāpi gahapati puriso sambahulāni telappadīpāni ekaṃ gharaṃ paveseyya tesaṃ ekaṃ gharaṃ pavesitānaṃ accinānattaṃ hi kho paññāyetha no ca ābhānānattaṃ evameva kho gahapati hoti kho so samayo yā tā devatā ekajjhaṃ sannipatanti tāsaṃ ekajjhaṃ sannipatitānaṃ vaṇṇanānattaṃ hi kho paññāyati no ca ābhānānattaṃ.

[426] Hoti kho so gahapati samayo yā tā devatā tato vipakkamanti tāsaṃ tato vipakkamantīnaṃ vaṇṇanānattañceva paññāyati ābhānānattañca . seyyathāpi gahapati puriso tāni sambahulāni telappadīpāni tamhā gharā nīhareyya tesaṃ tato nīharantānaṃ accinānattañceva paññāyetha ābhānānattañca evameva kho gahapati hoti kho so samayo yā tā devatā tato vipakkamanti tāsaṃ tato vipakkamantīnaṃ vaṇṇanānattañceva paññāyati ābhānānattañca.

[427] Na kho gahapati tāsaṃ devatānaṃ evaṃ hoti idamhākaṃ Niccanti vā dhuvanti vā sassatanti vā apica yattha yattheva tā devatā abhinivisanti tattha tattheva tā devatā abhiramanti . Seyyathāpi gahapati makkhikānaṃ kājena vā piṭakena vā hariyamānānaṃ na evaṃ hoti idamhākaṃ niccanti vā dhuvanti vā sassatanti vā apica yattha yattheva tā makkhikā abhinivisanti tattha tattheva tā makkhikā abhiramanti evameva kho gahapati tāsaṃ devatānaṃ na evaṃ hoti idamhākaṃ niccanti vā dhuvanti vā sassatanti vā apica yattha yattheva tā devatā abhinivisanti tattha tattheva tā devatā abhiramantīti.