[443] Atha kho bhagavā pubbaṇhasamayaṃ nivāsetvā pattacīvaramādāya kosambiṃ piṇḍāya pāvisi . kosambiyaṃ piṇḍāya caritvā pacchābhattaṃ piṇḍapātapaṭikkanto senāsanaṃ saṃsāmetvā pattacīvaraṃ ādāya ṭhitakova imā gāthā abhāsi puthusaddo samajano na bālo koci maññatha saṅghasmiṃ bhijjamānasmiṃ nāññaṃ bhiyyo amaññatha parimuṭṭhā paṇḍitā bhāsā vācāgocarabhāṇino yāvicchanti mukhāyāmaṃ yena nītā na taṃ vidū akkocchi maṃ avadhi maṃ ajini maṃ ahāsi me ye ca taṃ upanayhanti veraṃ tesaṃ na sammati akkocchi maṃ avadhi maṃ ajini maṃ ahāsi me Ye ca taṃ nūpanayhanti veraṃ tesūpasammati na hi verena verāni sammantīdha kudācanaṃ averena ca sammanti esa dhammo sanantano pare ca na vijānanti mayamettha yamāmhase ye ca tattha vijānanti tato sammanti medhagā aṭṭhicchidā pāṇaharā gavāssadhanahāriyo raṭṭhaṃ vilumpamānānaṃ tesampi hoti saṅgati kasmā tumhākaṃ no siyā sace labhetha nipakaṃ sahāyaṃ saddhiṃcaraṃ sādhuvihāridhīraṃ abhibhuyya sabbāni parissayāni careyya tenattamano satimā no ce labhetha nipakaṃ sahāyaṃ saddhiṃcaraṃ sādhuvihāridhīraṃ rājāva raṭṭhaṃ vijitaṃ pahāya eko care mātaṅgaraññeva nāgo ekassa caritaṃ seyyo natthi bāle sahāyatā eko care na ca pāpāni kayirā appossukko mātaṅgaraññeva nāgoti.

[444] Atha kho bhagavā ṭhitakova imā gāthā bhāsitvā yena bālakaloṇakāragāmo tenupasaṅkami . tena kho pana samayena āyasmā bhagu bālakaloṇakāragāme viharati . addasā kho āyasmā bhagu bhagavantaṃ dūratova āgacchantaṃ disvāna āsanaṃ paññāpesi udakañca pādānaṃ dhovanaṃ . nisīdi bhagavā paññatte āsane nisajja pāde pakkhālesi . āyasmāpi kho bhagu bhagavantaṃ abhivādetvā ekamantaṃ nisīdi . ekamantaṃ nisinnaṃ kho āyasmantaṃ bhaguṃ bhagavā etadavoca kacci bhikkhu khamanīyaṃ kacci yāpanīyaṃ kacci piṇḍakena na kilamasīti . Khamanīyaṃ bhagavā yāpanīyaṃ bhagavā na cāhaṃ bhante piṇḍakena kilamāmīti. Atha kho bhagavā āyasmantaṃ bhaguṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā yena pācīnavaṃsadāyo tenupasaṅkami.