[448] Āyasmāpi kho nandiyo āyasmāpi kho kimbilo bhagavantaṃ etadavoca mayhampi kho bhante evaṃ hoti lābhā vata me suladdhaṃ vata me yohaṃ evarūpehi sabrahmacārīhi saddhiṃ viharāmīti tassa mayhaṃ bhante imesu āyasmantesu mettaṃ kāyakammaṃ paccupaṭṭhitaṃ āvī ceva raho ca mettaṃ vacīkammaṃ paccupaṭṭhitaṃ āvī ceva raho ca mettaṃ manokammaṃ paccupaṭṭhitaṃ āvī ceva raho ca tassa mayhaṃ bhante evaṃ hoti yannūnāhaṃ sakaṃ cittaṃ nikkhipitvā imesaṃyeva āyasmantānaṃ cittassa vasena vatteyyanti so kho ahaṃ bhante sakaṃ cittaṃ nikkhipitvā imesaṃyeva āyasmantānaṃ cittassa vasena vattāmi nānā hi kho no bhante kāyā ekañca pana maññe cittanti . evaṃ kho mayaṃ bhante samaggā sammodamānā avivadamānā Khīrodakībhūtā aññamaññaṃ piyacakkhūhi sampassantā viharāmāti.

[449] Sādhu sādhu anuruddhā kacci pana vo anuruddhā appamattā ātāpino pahitattā viharathāti . taggha mayaṃ bhante appamattā ātāpino pahitattā viharāmāti . yathākathaṃ pana tumhe anuruddhā appamattā ātāpino pahitattā viharathāti.

[450] Idha bhante amhākaṃ yo paṭhamaṃ gāmato piṇḍāya paṭikkamati so āsanāni paññāpeti pānīyaṃ paribhojanīyaṃ upaṭṭhapeti avakkārapātiṃ upaṭṭhapeti yo pacchā gāmato piṇḍāya paṭikkamati sace hoti bhuttāvaseso sace ākaṅkhati bhuñjati no ce ākaṅkhati apaharite vā chaḍḍeti appāṇake vā udake opilāpeti so āsanāni paṭisāmeti pānīyaṃ paribhojanīyaṃ paṭisāmeti avakkārapātiṃ dhovitvā paṭisāmeti bhattaggaṃ sammajjati yo passati pānīyaghaṭaṃ vā paribhojanīyaghaṭaṃ vā vaccaghaṭaṃ vā rittaṃ tucchaṃ so upaṭṭhapeti sacāssa hoti avisayhaṃ hatthavikārena dutiyaṃ āmantetvā hatthavilaṅghakena pānīyaghaṭaṃ vā paribhojanīyaghaṭaṃ vā upaṭṭhapema na tveva mayaṃ bhante tappaccayā vācaṃ bhindāma pañcāhikaṃ kho pana mayaṃ bhante sabbarattiyaṃ dhammiyā kathāya sannisīdāma evaṃ kho mayaṃ bhante appamattā ātāpino pahitattā viharāmāti.

[451] Sādhu sādhu anuruddhā atthi kho pana vo anuruddhā evaṃ appamattānaṃ pahitattānaṃ viharataṃ uttari manussadhammā Alamariyañāṇadassanaviseso adhigato phāsuvihāroti . idha mayaṃ bhante appamattā ātāpino pahitattā viharantā obhāsañceva sañjānāma dassanañca rūpānaṃ so kho pana no obhāso nacirasseva antaradhāyati dassanañca rūpānaṃ tañca nimittaṃ appaṭivijjhāmāti.