[480] Santi bhikkhave tiracchānagatā pāṇā asucismiṃ jāyanti Asucismiṃ jīyanti asucismiṃ mīyanti . katame ca bhikkhave tiracchānagatā pāṇā asucismiṃ jāyanti asucismiṃ jīyanti asucismiṃ mīyanti . Ye te bhikkhave sattā pūtimacche vā jāyanti pūtimacche vā jīyanti pūtimacche vā mīyanti pūtikuṇape vā ... pūtikummāse vā ... candanikāya vā ... oḷigalle vā jāyanti .pe. ye vā panaññepi keci tiracchānagatā pāṇā asucismiṃ jāyanti asucismiṃ jīyanti asucismiṃ mīyanti . sa kho so bhikkhave bālo idha pubbe rasādo idha pāpāni kammāni karitvā kāyassa bhedā parammaraṇā tesaṃ sattānaṃ sahabyataṃ upapajjati ye te sattā asucismiṃ jāyanti asucismiṃ jīyanti asucismiṃ mīyanti . Anekapariyāyenapi kho ahaṃ bhikkhave tiracchānayonikathaṃ katheyyaṃ . Yāvañcidaṃ bhikkhave na sukaraṃ akkhānena pāpuṇituṃ yāva dukkhā tiracchānayoni.
[481] Seyyathāpi bhikkhave puriso ekacchiggaḷaṃ yugaṃ mahāsamudde pakkhipeyya . tamenaṃ puratthimo vāto pacchimena saṃhareyya pacchimo vāto puratthimena saṃhareyya uttaro vāto dakkhiṇena saṃhareyya dakkhiṇo vāto uttarena saṃhareyya . tatrāssa kāṇo kacchapo so vassasatassa accayena sakiṃ ummujjeyya . taṃ kiṃ maññatha bhikkhave api nu so kāṇo kacchapo amusmiṃ ekacchiggaḷe yuge gīvaṃ paveseyyāti . no hetaṃ bhante yadi nūna bhante kadāci Karahaci dīghassa addhuno accayenāti . khippataraṃ kho so bhikkhave kāṇo kacchapo amusmiṃ ekacchiggaḷe yuge gīvaṃ paveseyya . ato dullabhatarāhaṃ bhikkhave manussattaṃ vadāmi sakiṃ vinipātagatena bālena taṃ kissa hetu na hettha bhikkhave atthi dhammacariyā samacariyā kusalakiriyā puññakiriyā aññamaññakhādikā ettha bhikkhave vattati dubbalamārikā .
[482] Sa kho so bhikkhave bālo sace kadāci karahaci dīghassa addhuno accayena manussattaṃ āgacchati yāni tāni nīcakulāni caṇḍālakulaṃ vā nesādakulaṃ vā venukulaṃ vā rathakārakulaṃ vā pukkusakulaṃ vā tathārūpe kule pacchā jāyati daḷidde appannapānabhojane kasiravuttike yattha kasirena ghāsacchādo labbhati . so ca hoti dubbaṇṇo duddasiko okoṭimako bahvābādho kāṇo vā kuṇī vā khañjo vā pakkhahato vā na lābhī annassa pānassa vatthassa yānassa mālāgandhavilepanassa seyyāvasathapadīpeyyassa . So kāyena duccaritaṃ carati vācāya duccaritaṃ carati manasā duccaritaṃ carati . so kāyena duccaritaṃ caritvā vācāya duccaritaṃ caritvā manasā duccaritaṃ caritvā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjati.