[494] Puna caparaṃ bhikkhave rañño cakkavattissa itthīratanaṃ pātubhavati . sā abhirūpā dassanīyā pāsādikā paramāya vaṇṇapokkharatāya samannāgatā nātidīghā nātirassā nātikisā nātithūlā nātikāḷikā nāccodātā atikkantā mānusaṃ vaṇṇaṃ appattā dibbaṃ vaṇṇaṃ . tassa kho pana bhikkhave itthīratanassa evarūpo kāyasamphasso hoti seyyathāpi nāma tulapicuno vā kappāsapicuno vā . tassa kho pana bhikkhave itthīratanassa sīte uṇhāni gattāni honti uṇhe sītāni gattāni honti . tassa kho pana bhikkhave itthīratanassa kāyato candanagandho vāyati mukhato uppalagandho vāyati . taṃ kho pana bhikkhave itthīratanaṃ cakkavattissa pubbuṭṭhāyinī hoti pacchānipātinī kiṃkārapaṭissāvinī manāpacārinī piyavādinī . taṃ kho pana bhikkhave itthīratanaṃ rājānaṃ cakkavattiṃ manasāpi no aticarati kuto pana kāyena . rañño bhikkhave cakkavattissa evarūpaṃ Itthīratanaṃ pātubhavati.

[495] Puna caparaṃ bhikkhave rañño cakkavattissa gahapatiratanaṃ pātubhavati . tassa kammavipākajaṃ dibbaṃ cakkhu pātubhavati yena nidhiṃ passati sassāmikampi assāmikampi . so rājānaṃ cakkavattiṃ upasaṅkamitvā evamāha appossukko tvaṃ deva hohi ahante dhanena dhanakaraṇīyaṃ karissāmīti . bhūtapubbaṃ bhikkhave cakkavatti tameva gahapatiratanaṃ vīmaṃsamāno nāvaṃ abhirūhitvā majjhe gaṅgāya nadiyā sotaṃ ogāhitvā gahapatiratanaṃ etadavoca attho me gahapati hiraññasuvaṇṇenāti . tenahi mahārāja ekaṃ tīraṃ nāvā upetūti . Idheva me gahapati attho hiraññasuvaṇṇenāti . atha kho taṃ bhikkhave gahapatiratanaṃ ubhohi hatthehi udake omasitvā pūraṃ hiraññasuvaṇṇassa kumbhiṃ uddharitvā rājānaṃ cakkavattiṃ etadavoca alamettāvatā mahārāja katamettāvatā mahārāja pūjitamettāvatā mahārājāti . rājā cakkavatti evamāha alamettāvatā gahapati katamettāvatā gahapati pūjitamettāvatā gahapatīti . rañño bhikkhave cakkavattissa evarūpaṃ gahapatiratanaṃ pātubhavati.