[500] Puna caparaṃ bhikkhave rājā cakkavatti brāhmaṇagahapatikānaṃ piyo hoti manāpo . seyyathāpi bhikkhave pitā puttānaṃ piyo hoti manāpo evameva kho bhikkhave rājā cakkavatti brāhmaṇagahapatikānaṃ piyo hoti manāpo . rañño bhikkhave cakkavattissa brāhmaṇagahapatikā piyā honti manāpā . seyyathāpi bhikkhave pitu puttā piyā honti manāpā evameva kho bhikkhave rañño cakkavattissa Brāhmaṇagahapatikā piyā honti manāpā . bhūtapubbaṃ bhikkhave rājā cakkavatti caturaṅginiyā senāya uyyānabhūmiṃ niyyāsi . atha kho bhikkhave brāhmaṇagahapatikā rājānaṃ cakkavattiṃ upasaṅkamitvā evamāhaṃsu ataramāno deva yāhi yathā taṃ mayaṃ cirataraṃ passeyyāmāti. Rājāpi bhikkhave cakkavatti sārathiṃ āmantesi ataramāno sārathi pesehi yathāhaṃ brāhmaṇagahapatike cirataraṃ passeyyanti . rājā bhikkhave cakkavatti imāya catutthāya iddhiyā samannāgato hoti . Rājā bhikkhave cakkavatti imāhi catūhi iddhīhi samannāgato hoti. {500.1} Taṃ kiṃ maññatha bhikkhave api nu kho rājā cakkavatti imehi sattahi ratanehi samannāgato imāhi catūhi ca iddhīhi tatonidānaṃ sukhaṃ somanassaṃ paṭisaṃvediyethāti . ekamekenapi bhante ratanena samannāgato rājā cakkavatti tatonidānaṃ sukhaṃ somanassaṃ paṭisaṃvediyetha ko pana vādo sattahi ratanehi catūhi ca iddhīhīti.

[501] Atha kho bhagavā parittaṃ pāṇimattaṃ pāsāṇaṃ gahetvā bhikkhū āmantesi taṃ kiṃ maññatha bhikkhave katamo nu kho mahantataro yo cāyaṃ mayā paritto pāṇimatto pāsāṇo gahito himavā pabbatarājāti . appamattako ayaṃ bhante bhagavatā paritto pāṇimatto pāsāṇo gahito himavantaṃ pabbatarājānaṃ upanidhāya saṅkhampi na upeti kalabhāgampi na upeti upanidhampi na upetīti . Evameva kho bhikkhave ayaṃ rājā cakkavatti sattahi ratanehi Samannāgato catūhi ca iddhīhi tatonidānaṃ sukhaṃ somanassaṃ paṭisaṃvedeti . taṃ dibbassa sukhassa upanidhāya saṅkhampi na upeti kalabhāgampi na upeti upanidhampi na upeti.