[517] Hoti kho so bhikkhave samayo yaṃ kadāci karahaci dīghassa addhuno accayena tassa mahānirayassa puratthimadvāraṃ apāpurīyati . so tattha sīghena javena dhāvati . tassa sīghena javena dhāvato chavimpi ḍayhati cammampi ḍayhati maṃsampi ḍayhati nahārumpi ḍayhati aṭṭhīnipi sampadhūmāyanti ubbhataṃ tādisameva hoti . So tena dvārena nikkhamati . tassa kho pana bhikkhave mahānirayassa samanantarāsahitameva mahanto gūthanirayo . so tattha patati . tasmiṃ kho pana bhikkhave gūthaniraye sūcimukhā pāṇā chaviṃ chindanti chaviṃ chetvā cammaṃ chindanti cammaṃ chetvā maṃsaṃ chindanti maṃsaṃ chetvā nahāruṃ chindanti nahāruṃ chetvā aṭṭhiṃ chindanti aṭṭhiṃ chetvā aṭṭhimiñjaṃ khādanti . so tattha dukkhā tippā kaṭukā vedanā vedeti na ca tāva kālaṃ karoti yāva na taṃ pāpakammaṃ byantīhoti.

[518] Tassa kho pana bhikkhave gūthanirayassa samanantarāsahitameva Mahanto kukkulanirayo . so tattha patati . so tattha dukkhā tippā kaṭukā vedanā vedeti na ca tāva kālaṃ karoti yāva na taṃ pāpakammaṃ byantīhoti.

[519] Tassa kho pana bhikkhave kukkulanirayassa samanantarāsahitameva mahantaṃ simbalivanaṃ uccaṃ yojanasamuggataṃ soḷasaṅgulikaṇṭakaṃ ādittaṃ sampajjalitaṃ sañjotibhūtaṃ . taṃ tattha āropentipi oropentipi . So tattha dukkhā tippā kaṭukā vedanā vedeti na ca tāva kālaṃ karoti yāva na taṃ pāpakammaṃ byantīhoti.

[520] Tassa kho pana bhikkhave simbalivanassa samanantarāsahitameva mahantaṃ asipattavanaṃ . so tattha pavisati . tassa vāteritāni pattāni hatthampi chindanti pādampi chindanti hatthapādampi chindanti kaṇṇampi chindanti nāsampi chindanti kaṇṇanāsampi chindanti . So tattha dukkhā tippā kaṭukā vedanā vedeti na ca tāva kālaṃ karoti yāva na taṃ pāpakammaṃ byantīhoti.