[543] Kathañcāvuso paccuppannesu dhammesu na saṃhirati . Idhāvuso sutavā ariyasāvako ariyānaṃ dassāvī ariyadhammassa kovido ariyadhamme suvinīto sappurisānaṃ dassāvī sappurisadhammassa kovido sappurisadhamme suvinīto na rūpaṃ attato samanupassati na rūpavantaṃ vā attānaṃ na attani vā rūpaṃ na rūpasmiṃ vā attānaṃ na vedanaṃ .pe. na saññaṃ .pe. na saṅkhāre .pe. na viññāṇaṃ attato samanupassati na viññāṇavantaṃ vā attānaṃ na attani vā viññāṇaṃ na viññāṇasmiṃ vā attānaṃ . evaṃ kho āvuso paccuppannesu dhammesu na saṃhirati.

[544] Atītaṃ nānvāgameyya nappaṭikaṅkhe anāgataṃ yadatītampahīnantaṃ appattañca anāgataṃ paccuppannañca yo dhammaṃ tattha tattha vipassati asaṃhiraṃ asaṅkuppaṃ taṃ viddhā manubrūhaye ajjeva kiccamātappaṃ ko jaññā maraṇaṃ suve na hi no saṅgarantena mahāsenena maccunā evaṃvihārimātāpiṃ ahorattamatanditaṃ taṃ ve bhaddekarattoti santo ācikkhate munīti evaṃ kho ahaṃ bhante bhikkhū dhammiyā kathāya sandassesiṃ samādapesiṃ samuttejesiṃ sampahaṃsesiṃ bhaddekarattassa uddesañca vibhaṅgañca abhāsinti.

[545] Sādhu sādhu ānanda sādhu kho tvaṃ ānanda bhikkhū dhammiyā kathāya sandassesi samādapesi samuttejesi sampahaṃsesi bhaddekarattassa uddesañca vibhaṅgañca abhāsi atītaṃ nānvāgameyya .pe. Taṃ ve bhaddekarattoti santo ācikkhate munīti.

[546] Kathañcānanda atītaṃ anvāgameti .pe. evaṃ kho ānanda atītaṃ anvāgameti . kathañcānanda atītaṃ nānvāgameti .pe. evaṃ kho ānanda atītaṃ nānvāgameti . kathañcānanda anāgataṃ paṭikaṅkhati .pe. evaṃ kho ānanda anāgataṃ paṭikaṅkhati . Kathañcānanda anāgataṃ nappaṭikaṅkhati .pe. evaṃ kho ānanda anāgataṃ nappaṭikaṅkhati . kathañcānanda paccuppannesu dhammesu saṃhirati .pe. evaṃ kho ānanda paccuppannesu dhammesu saṃhirati . Kathañcānanda paccuppannesu dhammesu na saṃhirati .pe. evaṃ kho ānanda paccuppannesu dhammesu na saṃhirati.