[5] Seyyathāpi āvuso niganthā puriso sallena viddho assa savisena gāḷhūpalepanena . So sallassapi vedhanahetu dukkhā tippā kaṭukā vedanā vediyeyya tassa mittāmaccā ñātisālohitā bhisakkaṃ sallakattaṃ upaṭṭhapeyyuṃ . tassa so bhisakko sallakatto satthena vaṇamukhaṃ parikanteyya . so satthenapi vaṇamukhassa parikantanahetu dukkhā tippā kaṭukā vedanā vediyeyya tassa so bhisakko sallakatto esaniyā sallaṃ eseyya . so esaniyāpi sallassa esanahetu dukkhā tippā kaṭukā vedanā vediyeyya tassa so bhisakko sallakatto sallaṃ abbhūṇheyya . so sallassapi abbhūṇhanahetu dukkhā tippā kaṭukā vedanā vediyeyya tassa so bhisakko sallakatto agadaṅgāraṃ vaṇamukhe odaheyya . so agadaṅgārassapi vaṇamukhe odahanahetu dukkhā tippā kaṭukā vedanā vediyeyya. {5.1} So aparena samayena rūḷhena vaṇena sañchavinā arogo assa sukhī serī sayaṃvasī yenakāmaṅgamo . tassa evamassa ahaṃ kho pubbe sallena viddho ahosiṃ savisena gāḷhūpalepanena Sohaṃ sallassapi vedhanahetu dukkhā tippā kaṭukā vedanā vediyiṃ tassa me mittāmaccā ñātisālohitā bhisakkaṃ sallakattaṃ upaṭṭhapesuṃ tassa me so bhisakko sallakatto satthena vaṇamukhaṃ parikantati sohaṃ satthenapi vaṇamukhassa parikantanahetu dukkhā tippā kaṭukā vedanā vediyiṃ tassa me so bhisakko sallakatto esaniyā sallaṃ esi sohaṃ esaniyāpi sallassa esanahetu dukkhā tippā kaṭukā vedanā vediyiṃ tassa me so bhisakko sallakatto sallaṃ abbhūṇhi sohaṃ sallassapi abbhūṇhanahetu dukkhā tippā kaṭukā vedanā vediyiṃ tassa me so bhisakko sallakatto agadaṅgāraṃ vaṇamukhe odahi sohaṃ agadaṅgārassapi vaṇamukhe odahanahetu dukkhā tippā kaṭukā vedanā vediyiṃ sohaṃ etarahi rūḷhena vaṇena sañchavinā arogo sukhī serī sayaṃvasī yenakāmaṅgamoti. {5.2} Evameva kho āvuso niganthā sace tumhe jāneyyātha ahuvamheva mayaṃ pubbe na nāhuvamhāti jāneyyātha akaramheva mayaṃ pubbe pāpakammaṃ na nākaramhāti jāneyyātha evarūpaṃ vā evarūpaṃ vā pāpakammaṃ akaramhāti jāneyyātha ettakaṃ vā dukkhaṃ nijjiṇṇaṃ ettakaṃ vā dukkhaṃ nijjiretabbaṃ ettakamhi vā dukkhe nijjiṇṇe sabbaṃ dukkhaṃ nijjiṇṇaṃ bhavissatīti jāneyyātha diṭṭheva dhamme akusalānaṃ dhammānaṃ pahānaṃ kusalānaṃ dhammānaṃ upasampadaṃ evaṃ sante āyasmantānaṃ niganthānaṃ kallamassa veyyākaraṇāya Yaṅkiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbantaṃ pubbe katahetu iti purāṇānaṃ kammānaṃ tapasā byantibhāvā navānaṃ kammānaṃ akaraṇā āyatiṃ anavassavo āyatiṃ anavassavā kammakkhayo kammakkhayā dukkhakkhayo dukkhakkhayā vedanākkhayo vedanākkhayā sabbaṃ dukkhaṃ nijjiṇṇaṃ bhavissatīti. {5.3} Yasmā ca kho tumhe āvuso niganthā na jānātha ahuvamheva mayaṃ pubbe na nāhuvamhāti na jānātha akaramheva mayaṃ pubbe pāpakammaṃ na nākaramhāti na jānātha evarūpaṃ vā evarūpaṃ vā pāpakammaṃ akaramhāti na jānātha ettakaṃ vā dukkhaṃ nijjiṇṇaṃ ettakaṃ vā dukkhaṃ nijjiretabbaṃ ettakamhi vā dukkhe nijjiṇṇe sabbaṃ dukkhaṃ nijjiṇṇaṃ bhavissatīti na jānātha diṭṭheva dhamme akusalānaṃ dhammānaṃ pahānaṃ kusalānaṃ dhammānaṃ upasampadaṃ tasmā āyasmantānaṃ niganthānaṃ na kallamassa veyyākaraṇāya yaṅkiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbantaṃ pubbe katahetu iti purāṇānaṃ kammānaṃ tapasā byantibhāvā navānaṃ kammānaṃ akaraṇā āyatiṃ anavassavo āyatiṃ anavassavā kammakkhayo kammakkhayā dukkhakkhayo dukkhakkhayā vedanākkhayo vedanākkhayā sabbaṃ [1]- dukkhaṃ nijjiṇṇaṃ bhavissatīti.