[46] Tatra ce tumhākaṃ evamassa imesaṃ kho āyasmantānaṃ atthato hi kho nānaṃ byañjanato sametīti tattha yaṃ bhikkhuṃ suvacataraṃ maññeyyātha so upasaṅkamitvā evamassa vacīyo āyasmantānaṃ kho atthato hi kho nānaṃ byañjanato sameti tadimināpetaṃ āyasmanto jānātha yathā atthato hi kho nānaṃ byañjanato sameti mā āyasmanto vivādaṃ āpajjitthāti . athāparesaṃ ekatopakkhikānaṃ bhikkhūnaṃ yaṃ bhikkhuṃ suvacataraṃ maññeyyātha so upasaṅkamitvā evamassa vacanīyo āyasmantānaṃ kho atthato hi kho nānaṃ byañjanato sameti tadimināpetaṃ āyasmanto jānātha yathā atthato hi kho nānaṃ byañjanato sameti mā āyasmanto vivādaṃ āpajjitthāti . Iti duggahitaṃ duggahitato dhāretabbaṃ sugahitaṃ sugahitato dhāretabbaṃ duggahitaṃ duggahitato dhāretvā sugahitaṃ sugahitato dhāretvā yo dhammo yo vinayo so bhāsitabbo.

[47] Tatra ce tumhākaṃ evamassa imesaṃ kho āyasmantānaṃ atthato hi kho sameti byañjanato nānanti . tattha yaṃ bhikkhuṃ suvacataraṃ maññeyyātha so upasaṅkamitvā evamassa vacanīyo āyasmantānaṃ kho atthato hi kho sameti byañjanato nānaṃ tadimināpetaṃ āyasmanto jānātha yathā atthato hi kho sameti byañjanato nānaṃ appamattakaṃ kho panetaṃ yadidaṃ byañjanaṃ mā āyasmanto appamattake vivādaṃ āpajjitthāti . athāparesaṃ ekatopakkhikānaṃ Bhikkhūnaṃ yaṃ bhikkhuṃ suvacataraṃ maññeyyātha so upasaṅkamitvā evamassa vacanīyo āyasmantānaṃ kho atthato hi kho sameti byañjanato nānaṃ tadimināpetaṃ āyasmanto jānātha atthato hi kho sameti byañjanato nānaṃ appamattakaṃ kho panetaṃ yadidaṃ byañjanaṃ mā āyasmanto appamattake vivādaṃ āpajjitthāti . iti sugahitaṃ sugahitato dhāretabbaṃ duggahitaṃ duggahitato dhāretabbaṃ sugahitaṃ sugahitato dhāretvā duggahitaṃ duggahitato dhāretvā yo dhammo yo vinayo so bhāsitabbo.

[48] Tatra ce tumhākaṃ evamassa imesaṃ kho āyasmantānaṃ atthato ceva sameti byañjanato ca sametīti . tattha yaṃ bhikkhuṃ suvacataraṃ maññeyyātha so upasaṅkamitvā evamassa vacanīyo āyasmantānaṃ kho atthato ceva sameti byañjanato ca sameti tadimināpetaṃ āyasmanto jānātha yathā atthato ceva sameti byañjanato ca sameti mā āyasmanto vivādaṃ āpajjitthāti . athāparesaṃ ekatopakkhikānaṃ bhikkhūnaṃ yaṃ bhikkhuṃ suvacataraṃ maññeyyātha so upasaṅkamitvā evamassa vacanīyo āyasmantānaṃ kho atthato ceva sameti byañjanato ca sameti tadimināpetaṃ āyasmanto jānātha yathā atthato ceva sameti byañjanato ca sameti mā āyasmanto vivādaṃ āpajjitthāti . iti sugahitaṃ sugahitato dhāretabbaṃ sugahitaṃ sugahitato dhāretvā yo dhammo yo vinayo so bhāsitabbo.