[49] Tesañca vo bhikkhave samaggānaṃ sammodamānānaṃ avivadamānānaṃ sikkhataṃ siyā aññatarassa bhikkhuno āpatti siyā vītikkamo . Tatra bhikkhave na codanāya coditabbaṃ puggalo upaparikkhitabbo iti mayhañca avihesā bhavissati parassa ca puggalassa anupaghāto paro hi puggalo akkodhano anupanāhī adaḷhadiṭṭhī supaṭinissaggī sakkomi cāhaṃ etaṃ puggalaṃ akusalā vuṭṭhāpetvā kusale patiṭṭhāpetunti. Sace bhikkhave evamassa kallaṃ vacanāya . sace pana bhikkhave evamassa mayhaṃ kho avihesā bhavissati parassa ca puggalassa upaghāto paro hi puggalo kodhano upanāhī daḷhadiṭṭhī supaṭinissaggī sakkomi cāhaṃ etaṃ puggalaṃ akusalā vuṭṭhāpetvā kusale patiṭṭhāpetuṃ appamattakaṃ kho panetaṃ yadidaṃ parassa puggalassa upaghāto atha kho etadeva bahutaraṃ svāhaṃ sakkomi etaṃ puggalaṃ akusalā vuṭṭhāpetvā kusale patiṭṭhāpetunti . sace bhikkhave evamassa kallaṃ vacanāya. {49.1} Sace pana bhikkhave evamassa mayhaṃ kho vihesā bhavissati parassa puggalassa anupaghāto paro hi puggalo akkodhano anupanāhī daḷhadiṭṭhī supaṭinissaggī sakkomi cāhaṃ etaṃ puggalaṃ akusalā vuṭṭhāpetvā kusale patiṭṭhāpetuṃ appamattakaṃ kho panetaṃ yadidaṃ mayhaṃ vihesā atha kho etadeva bahutaraṃ svāhaṃ sakkomi etaṃ puggalaṃ akusalā vuṭṭhāpetvā kusale Patiṭṭhāpetunti. Sace bhikkhave evamassa kallaṃ vacanāya. {49.2} Sace pana bhikkhave evamassa mayhañca kho vihesā bhavissati parassa ca puggalassa upaghāto paro hi puggalo kodhano upanāhī daḷhadiṭṭhī duppaṭinissaggī sakkomi cāhaṃ etaṃ puggalaṃ akusalā vuṭṭhāpetvā kusale patiṭṭhāpetuṃ appamattakaṃ kho panetaṃ yadidaṃ mayhañca vihesā [1]- parassa ca puggalassa upaghāto atha kho etadeva bahutaraṃ svāhaṃ sakkomi etaṃ puggalaṃ akusalā vuṭṭhāpetvā kusale patiṭṭhāpetunti . sace bhikkhave evamassa kallaṃ vacanāya . Sace pana bhikkhave evamassa mayhañca kho vihesā bhavissati parassa ca puggalassa upaghāto paro hi puggalo kodhano upanāhī daḷhadiṭṭhī duppaṭinissaggī na cāhaṃ sakkomi etaṃ puggalaṃ akusalā vuṭṭhāpetvā kusale patiṭṭhāpetunti . evarūpe [2]- puggale upekkhā nātimaññitabbā.