[50] Tesañca vo bhikkhave samaggānaṃ sammodamānānaṃ avivadamānānaṃ sikkhataṃ aññamaññassa vacīsaṅkhāro uppajjeyya diṭṭhipaḷāso cetaso āghāto appaccayo anabhiraddhi . tattha ekatopakkhikānaṃ bhikkhūnaṃ yaṃ bhikkhuṃ suvacataraṃ maññeyyātha so upasaṅkamitvā evamassa vacanīyo yanno āvuso amhākaṃ samaggānaṃ sammodamānānaṃ avivadamānānaṃ sikkhataṃ aññamaññassa vacīsaṅkhāro uppanno diṭṭhipaḷāso cetaso āghāto appaccayo anabhiraddhi taṃ jānamāno samaṇo garaheyyāti . sammā byākaramāno bhikkhave bhikkhu evaṃ Byākareyya yanno āvuso amhākaṃ samaggānaṃ sammodamānānaṃ avivadamānānaṃ sikkhataṃ aññamaññassa vacīsaṅkhāro uppanno diṭṭhipaḷāso cetaso āghāto appaccayo anabhiraddhi taṃ jānamāno samaṇo garaheyyāti . etampanāvuso dhammaṃ appahāya nibbānaṃ sacchikareyyāti . sammā byākaramāno bhikkhave bhikkhu evaṃ byākareyya etaṃ kho āvuso dhammaṃ appahāya na nibbānaṃ sacchikareyyāti. {50.1} Athāparesaṃ ekatopakkhikānaṃ bhikkhūnaṃ yaṃ bhikkhuṃ suvacataraṃ maññeyyātha so upasaṅkamitvā evamassa vacanīyo yanno āvuso amhākaṃ samaggānaṃ sammodamānānaṃ avivadamānānaṃ sikkhataṃ aññamaññassa vacīsaṅkhāro uppanno diṭṭhipaḷāso cetaso āghāto appaccayo anabhiraddhi taṃ jānamāno samaṇo garaheyyāti . sammā byākaramāno bhikkhave bhikkhu evaṃ byākareyya yanno āvuso amhākaṃ samaggānaṃ sammodamānānaṃ avivadamānānaṃ sikkhataṃ aññamaññassa vacīsaṅkhāro uppanno diṭṭhipaḷāso cetaso āghāto appaccayo anabhiraddhi taṃ jānamāno samaṇo garaheyyāti. {50.2} Etampanāvuso dhammaṃ appahāya [1]- nibbānaṃ sacchikareyyāti sammā byākaramāno bhikkhave bhikkhu evaṃ byākareyya etaṃ kho āvuso dhammaṃ appahāya na nibbānaṃ sacchikareyyāti . tañce bhikkhave bhikkhuṃ pare evaṃ puccheyyuṃ āyasmatā no ete bhikkhū akusalā vuṭṭhāpetvā kusale patiṭṭhāpitāti . sammā byākaramāno bhikkhave bhikkhu evaṃ Byākareyya idhāhaṃ āvuso yena bhagavā tenupasaṅkamiṃ tassa me bhagavā dhammaṃ deseti tassāhaṃ dhammaṃ sutvā tesaṃ bhikkhūnaṃ abhāsiṃ taṃ te bhikkhū dhammaṃ sutvā akusalā vuṭṭhahiṃsu kusale patiṭṭhahiṃsūti . Evaṃ byākaramāno kho bhikkhave bhikkhu na cevattānukkaṃseti na paraṃ vambheti dhammassa cānudhammaṃ byākaroti na ca koci sahadhammiko vādānuvādo gārayhaṭṭhānaṃ āgacchatīti. Idamavoca bhagavā attamanā te bhikkhū bhagavato bhāsitaṃ abhinandunti. Kintisuttaṃ niṭṭhitaṃ tatiyaṃ. ---------