[656] Etete ubho ante anupagamma majjhimā paṭipadā tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saṃvattatīti iti kho panetaṃ vuttaṃ . kiñcetaṃ paṭicca vuttaṃ . ayameva ariyo aṭṭhaṅgiko maggo seyyathīdaṃ Sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi . etete ubho ante anupagamma majjhimā paṭipadā tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saṃvattatīti iti yantaṃ vuttaṃ idametaṃ paṭicca vuttaṃ.

[657] Ussādanañca jaññā apasādanañca jaññā ussādanañca ñatvā apasādanañca ñatvā nevussādeyya na apasādeyya dhammameva deseyyāti iti kho panetaṃ vuttaṃ . kiñcetaṃ paṭicca vuttaṃ. Kathañca bhikkhave ussādanā ca hoti apasādanā ca no ca dhammadesanā. Ye kāmapaṭisandhisukhino somanassānuyogaṃ anuyuttā hīnaṃ gammaṃ pothujjanikaṃ anariyaṃ anatthasañhitaṃ sabbe te sadukkhā saupaghātā saupāyāsā sapariḷāhā micchāpaṭipannāti iti vadaṃ ittheke apasādeti. {657.1} Ye kāmapaṭisandhisukhino somanassānuyogaṃ ananuyuttā hīnaṃ gammaṃ pothujjanikaṃ anariyaṃ anatthasañhitaṃ sabbe te adukkhā anūpaghātā anūpāyāsā apariḷāhā sammāpaṭipannāti iti vadaṃ ittheke ussādeti. {657.2} Ye attakilamathānuyogaṃ anuyuttā dukkhaṃ anariyaṃ anatthasañhitaṃ sabbe te sadukkhā saupaghātā saupāyāsā sapariḷāhā micchāpaṭipannāti iti vadaṃ ittheke apasādeti. {657.3} Ye attakilamathānuyogaṃ ananuyuttā dukkhaṃ anariyaṃ anatthasañhitaṃ sabbe te adukkhā anūpaghātā anūpāyāsā apariḷāhā Sammāpaṭipannāti iti vadaṃ ittheke ussādeti . yesaṃ kesañci bhavasaññojanaṃ appahīnaṃ sabbe te sadukkhā saupaghātā saupāyāsā sapariḷāhā micchāpaṭipannāti iti vadaṃ ittheke apasādeti. {657.4} Yesaṃ kesañci bhavasaññojanaṃ pahīnaṃ sabbe te adukkhā anūpaghātā anūpāyāsā apariḷāhā sammāpaṭipannāti iti vadaṃ ittheke ussādeti . evaṃ kho bhikkhave ussādanā ca hoti apasādanā ca no ca dhammadesanā.