[659] Sukhavinicchayaṃ jaññā sukhavinicchayaṃ ñatvā ajjhattaṃ sukhamanuyuñjeyyāti iti kho panetaṃ vuttaṃ . kiñcetaṃ paṭicca vuttaṃ . Pañcime bhikkhave kāmaguṇā katame pañca cakkhuviññeyyā rūpā iṭṭhā kantā manāpā piyarūpā kāmūpasañhitā rajanīyā Sotaviññeyyā saddā ... ghānaviññeyyā gandhā ... Jivhāviññeyyā rasā ... kāyaviññeyyā phoṭṭhabbā iṭṭhā kantā manāpā piyarūpā kāmūpasañhitā rajanīyā ime kho bhikkhave pañca kāmaguṇā . Yaṃ kho bhikkhave ime pañca kāmaguṇe paṭicca uppajjati sukhaṃ somanassaṃ idaṃ vuccati kāmasukhaṃ puthujjanasukhaṃ miḷhasukhaṃ anariyasukhaṃ . Na sevitabbaṃ na bhāvetabbaṃ na bahulīkātabbaṃ bhāyitabbaṃ etassa sukhassāti vadāmi. {659.1} Idha bhikkhave bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati . vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ ... Tatiyaṃ jhānaṃ ... catutthaṃ jhānaṃ upasampajja viharati idaṃ vuccati nekkhammasukhaṃ pavivekasukhaṃ upasamasukhaṃ sambodhisukhaṃ . āsevitabbaṃ bhāvetabbaṃ bahulīkātabbaṃ na bhāyitabbaṃ etassa sukhassāti vadāmi . Sukhavinicchayaṃ jaññā sukhavinicchayaṃ ñatvā ajjhattaṃ sukhamanuyuñjeyyāti iti yantaṃ vuttaṃ idametaṃ paṭicca vuttaṃ.
[660] Raho vādaṃ na bhāseyya sammukhā nātikhīṇaṃ bhaṇeti iti kho panetaṃ vuttaṃ . kiñcetaṃ paṭicca vuttaṃ . tatra bhikkhave yaṃ jaññā raho vādaṃ abbhūtaṃ atacchaṃ anatthasañhitaṃ sasakkaṃ taṃ raho vādaṃ na bhāseyya yampi jaññā raho vādaṃ bhūtaṃ tacchaṃ anatthasañhitaṃ tassapi sikkheyya avacanāya yañca kho jaññā Raho vādaṃ bhūtaṃ tacchaṃ atthasañhitaṃ tatra kālaññū assa tassa raho vādassa vacanāya . tatra bhikkhave yaṃ jaññā sammukhā khīṇavādaṃ abbhūtaṃ atacchaṃ anatthasañhitaṃ sasakkaṃ taṃ sammukhā khīṇavādaṃ na bhāseyya yampi jaññā sammukhā khīṇavādaṃ bhūtaṃ tacchaṃ anatthasañhitaṃ tassapi sikkheyya avacanāya yañca kho jaññā sammukhā khīṇavādaṃ bhūtaṃ tacchaṃ atthasañhitaṃ tatra kālaññū assa tassa sammukhā khīṇavādassa vacanāya . raho vādaṃ na bhāseyya sammukhā nātikhīṇaṃ bhaṇeti iti yantaṃ vuttaṃ idametaṃ paṭicca vuttaṃ.