[673] Evamme sutaṃ ekaṃ samayaṃ bhagavā magadhesu cārikañcaramāno yena rājagahaṃ tadavasari yena bhaggavo kumbhakāro tenupasaṅkami upasaṅkamitvā bhaggavaṃ kumbhakāraṃ etadavoca sace te bhaggava agaru viharāma nivesane ekarattinti . na kho me bhante garu atthi cettha pabbajito paṭhamaṃ vāsūpagato hoti sace so anujānāti viharatha bhante yathāsukhanti.

[674] Tena kho pana samayena pukkusāti nāma kulaputto bhagavantaṃ uddissa saddhāya agārasmā anagāriyaṃ pabbajito . so tasmiṃ kumbhakāranivesane paṭhamaṃ vāsūpagato hoti . atha kho bhagavā yenāyasmā pukkusāti tenupasaṅkami upasaṅkamitvā āyasmantaṃ pukkusātiṃ etadavoca sace te bhikkhu agaru viharāma nivesane ekarattinti . ūrundaṃ āvuso kumbhakāranivesanaṃ viharatāyasmā yathāsukhanti.

[675] Atha kho bhagavā kumbhakāranivesanaṃ pavisitvā ekamantaṃ tiṇasantharakaṃ paññāpetvā nisīdi pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā . atha kho bhagavā bahudeva rattiṃ nisajjāya vītināmesi . āyasmāpi kho pukkusāti bahudeva Rattiṃ nisajjāya vītināmesi . atha kho bhagavato etadahosi pāsādikaṃ nu kho ayaṃ kulaputto iriyati yannūnāhaṃ puccheyyanti . atha kho bhagavā āyasmantaṃ pukkusātiṃ etadavoca kaṃsi tvaṃ bhikkhu uddissa pabbajito ko vā te satthā kassa vā tvaṃ dhammaṃ rocesīti.

[676] Atthāvuso samaṇo gotamo sakyaputto sakyakulā pabbajito taṃ kho pana bhavantaṃ gotamaṃ evaṃkalyāṇo kittisaddo abbhuggato itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavāti tāhaṃ bhagavantaṃ uddissa pabbajito so ca me bhagavā satthā tassāhaṃ bhagavato dhammaṃ rocemīti . kahaṃ pana bhikkhu etarahi so bhagavā viharati arahaṃ sammāsambuddhoti . atthāvuso uttaresu janapadesu sāvatthī nāma nagaraṃ tattha so bhagavā etarahi viharati arahaṃ sammāsambuddhoti . diṭṭhapubbo pana te bhikkhu so bhagavā disvā ca pana jāneyyāsīti . na kho me āvuso diṭṭhapubbo so bhagavā disvāhaṃ na jāneyyanti.