[693] Yattha ṭhitaṃ maññassavā nappavattanti maññassave kho pana nappavattamāne muni santoti vuccatīti iti kho panetaṃ vuttaṃ . Kiñcetaṃ paṭicca vuttaṃ . asmīti bhikkhu maññitametaṃ nāhamasmīti maññitametaṃ bhavissanti maññitametaṃ na bhavissanti maññitametaṃ rūpī bhavissanti maññitametaṃ arūpī bhavissanti maññitametaṃ saññī bhavissanti maññītametaṃ asaññī bhavissanti maññitametaṃ nevasaññīnāsaññī bhavissanti maññitametaṃ . maññitaṃ bhikkhu rogo maññitaṃ gaṇḍo maññitaṃ sallaṃ . sabbamaññitānaṃ tveva bhikkhu samatikkamā muni santoti vuccati . muni kho pana bhikkhu santo na jāyati na jiyyati na miyyati na kuppati nappiheti . Tampissa bhikkhu natthi yena jāyetha ajāyamāno kiṃ jiyyissati ajiyyamāno kiṃ miyyissati amiyyamāno kiṃ kuppissati akuppamāno kissa pihessati . yattha ṭhitaṃ maññassavā nappavattanti maññassave kho pana nappavattamāne muni santoti vuccatīti iti yantaṃ vuttaṃ idametaṃ paṭicca vuttaṃ . Imaṃ kho me tvaṃ bhikkhu saṅkhittena chadhātuvibhaṅgaṃ dhārehīti.

[694] Atha āyasmā pukkusāti satthā kira me anuppatto sugato kira me anuppatto sammāsambuddho kira me anuppattoti uṭṭhāyāsanā ekaṃsaṃ cīvaraṃ katvā bhagavato pādesu sirasā nipatitvā bhagavantaṃ etadavoca accayo maṃ bhante accagamā yathābālaṃ yathāmūḷhaṃ yathāakusalaṃ yohaṃ bhagavantaṃ āvusovādena samudācaritabbaṃ amaññissaṃ tassa me bhante bhagavā accayaṃ accayato paṭiggaṇhātu āyatiṃ saṃvarāyāti.

[695] Taggha tvaṃ bhikkhu accayo accagamā yathābālaṃ yathāmūḷhaṃ yathāakusalaṃ yaṃ maṃ tvaṃ āvusovādena samudācaritabbaṃ amaññittho yato ca kho tvaṃ bhikkhu accayaṃ accayato disvā yathādhammaṃ paṭikkarosi tante mayaṃ paṭiggaṇhāma vuḍḍhi hesā bhikkhu ariyassa vinaye yo accayaṃ accayato disvā yathādhammaṃ paṭikkaroti āyatiṃ saṃvaraṃ āpajjatīti . labheyyāhaṃ bhante bhagavato santike upasampadanti . paripuṇṇaṃ pana te bhikkhu pattacīvaranti . Na kho me bhante paripuṇṇaṃ pattacīvaranti . na kho bhikkhu tathāgatā aparipuṇṇapattacīvaraṃ upasampādentīti.