[761] Sace pana te puṇṇa sunāparantakā manussā satthena pahāraṃ dassanti tattha pana te puṇṇa kinti bhavissatīti . sace me bhante sunāparantakā manussā satthena pahāraṃ dassanti tattha me evaṃ bhavissati bhaddakā vatime sunāparantakā manussā subhaddakā vatime sunāparantakā manussā yaṃ maṃ nayime tiṇhena satthena jīvitā voropentīti evamettha bhagavā bhavissati evamettha sugata bhavissatīti.

[762] Sace pana taṃ puṇṇa sunāparantakā manussā tiṇhena satthena jīvitā voropessanti tattha pana te puṇṇa kinti bhavissatīti . sace maṃ bhante sunāparantakā manussā tiṇhena satthena jīvitā voropessanti tattha me evaṃ bhavissati santi kho bhagavato sāvakā kāyena ca jīvitena ca aṭṭiyamānā harāyamānā jigucchiyamānā satthahārakaṃ pariyesanti taṃ me idaṃ apariyiṭṭhaṃyeva satthahārakaṃ laddhanti evamettha bhagavā bhavissati evamettha sugata bhavissatīti.

[763] Sādhu sādhu puṇṇa sakkhissasi kho tvaṃ puṇṇa iminā damūpasamena samannāgato sunāparantasmiṃ janapade viharituṃ yassadāni tvaṃ puṇṇa kālaṃ maññasīti . atha kho āyasmā puṇṇo bhagavato bhāsitaṃ abhinanditvā anumoditvā uṭṭhāyāsanā bhagavantaṃ Abhivādetvā padakkhiṇaṃ katvā senāsanaṃ saṃsāmetvā pattacīvaramādāya yena sunāparanto janapado tena cārikaṃ pakkāmi . anupubbena cārikañcaramāno yena sunāparanto janapado tadavasari.

[764] Tatra sudaṃ āyasmā puṇṇo sunāparantasmiṃ janapade viharati . atha kho āyasmā puṇṇo tenevantaravassena pañcamattāni upāsakasatāni paṭidesesi tenevantaravassena pañcamattāni upāsikāsatāni paṭidesesi tenevantaravassena tisso vijjā sacchākāsi . atha kho āyasmā puṇṇo aparena samayena parinibbāyi. Atha kho sambahulā bhikkhū yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ nisinnā kho te bhikkhū bhagavantaṃ etadavocuṃ yo so bhante puṇṇo nāma kulaputto bhagavatā saṅkhittena ovādena ovadito so kālakato tassa kā gati ko abhisamparāyoti.