[774] Seyyathāpi bhaginiyo mahato rukkhassa tiṭṭhato sāravato mūlampi aniccaṃ vipariṇāmadhammaṃ khandhopi anicco vipariṇāmadhammo sākhāpalāsampi aniccaṃ vipariṇāmadhammaṃ chāyāpi aniccā vipariṇāmadhammā . yo nu kho bhaginiyo evaṃ vadeyya amussa mahato rukkhassa tiṭṭhato sāravato mūlampi aniccaṃ vipariṇāmadhammaṃ khandhopi anicco vipariṇāmadhammo sākhāpalāsampi aniccaṃ vipariṇāmadhammaṃ yā ca khvassa chāyā sā niccā dhuvā sassatā avipariṇāmadhammāti sammā nu kho so bhaginiyo vadamāno vadeyyāti . no hetaṃ bhante . taṃ kissa hetu . amussa hi bhante mahato rukkhassa tiṭṭhato sāravato mūlampi aniccaṃ vipariṇāmadhammaṃ khandhopi anicco vipariṇāmadhammo sākhāpalāsampi aniccaṃ vipariṇāmadhammaṃ pagevassa chāyā aniccā vipariṇāmadhammāti.

[775] Evameva kho bhaginiyo yo nu kho evaṃ vadeyya cha kho me bāhirā āyatanā aniccā [1]- yañca kho bāhire āyatane paṭicca paṭisaṃvedemi sukhaṃ vā dukkhaṃ vā adukkhamasukhaṃ vā taṃ niccaṃ dhuvaṃ sassataṃ avipariṇāmadhammanti sammā nu kho so bhaginiyo Vadamāno vadeyyāti . no hetaṃ bhante . taṃ kissa hetu. Tajjaṃ tajjaṃ bhante paccayaṃ paṭicca tajjā tajjā vedanā uppajjati tajjassa tajjassa paccayassa nirodhā tajjā tajjā vedanā nirujjhatīti . sādhu sādhu bhaginiyo evaṃ hetaṃ bhaginiyo hoti ariyasāvakassa yathābhūtaṃ sammappaññāya passato.

[776] Seyyathāpi bhaginiyo dakkho goghātako vā goghātakantevāsī vā gāviṃ vadhitvā tiṇhena govikantanena gāviṃ vikanteyya anupahacca antaraṃ maṃsakāyaṃ anupahacca bāhiraṃ cammakāyaṃ yaṃ yadeva tattha antarā vilimaṃsaṃ antarā nahārū antarā bandhanaṃ taṃ tadeva tiṇhena govikantanena sañchindeyya saṅkanteyya samparikanteyya sañchinditvā saṅkantitvā samparikantitvā vidhunitvā bāhiraṃ cammakāyaṃ teneva cammena taṃ gāviṃ paṭicchādetvā evaṃ vadeyya tathevāyaṃ gāvī saṃyuttā iminā cammenāti sammā nu kho so bhaginiyo vadamāno vadeyyāti . no hetaṃ bhante . Taṃ kissa hetu. Asu hi bhante dakkho goghātako vā goghātakantevāsī vā gāviṃ vadhitvā tiṇhena govikantanena gāviṃ vikanteyya anupahacca antaraṃ maṃsakāyaṃ anupahacca bāhiraṃ cammakāyaṃ yaṃ yadeva tattha antarā vilimaṃsaṃ antarā nahārū antarā bandhanaṃ taṃ tadeva tiṇhena govikantanena sañchindeyya saṅkanteyya samparikanteyya sañchinditvā saṅkantitvā samparikantitvā vidhunitvā bāhiraṃ cammakāyaṃ Teneva cammena taṃ gāviṃ paṭicchādetvā kiñcāpi so evaṃ vadeyya tathevāyaṃ gāvī saṃyuttā iminā cammenāti atha kho sā gāvī visaṃyuttā teneva cammena .