[777] Upamā kho me ayaṃ bhaginiyo katā atthassa viññāpanāya. Ayamevettha attho . antaro maṃsakāyoti kho bhaginiyo channetaṃ ajjhattikānaṃ āyatanānaṃ adhivacanaṃ . bāhiro cammakāyoti kho bhaginiyo channetaṃ bāhirānaṃ āyatanānaṃ adhivacanaṃ . antarā vilimaṃsaṃ antarā nahārū antarā bandhanti kho bhaginiyo nandirāgassetaṃ adhivacanaṃ . tiṇhaṃ govikantananti kho bhaginiyo ariyāyetaṃ paññāya adhivacanaṃ yāyaṃ ariyā paññā antarā kilesaṃ antarā saññojanaṃ antarā bandhanaṃ sañchindati saṅkantati samparikantati.

[778] Satta kho ime bhaginiyo bojjhaṅgā yesaṃ bhāvitattā bahulīkatattā bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati . katame satta . idha bhaginiyo bhikkhu satisambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ dhammavicayasambojjhaṅgaṃ bhāveti ... viriyasambojjhaṅgaṃ bhāveti ... pītisambojjhaṅgaṃ bhāveti ... passaddhisambojjhaṅgaṃ bhāveti ... samādhisambojjhaṅgaṃ bhāveti ... upekkhāsambojjhaṅgaṃ bhāveti vivekanissitaṃ Virāganissitaṃ nirodhanissitaṃ vossaggapariṇāmiṃ . ime kho bhaginiyo satta bojjhaṅgā yesaṃ bhāvitattā bahulīkatattā bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharatīti.

[779] Atha kho āyasmā nandako tā bhikkhuniyo iminā ovādena ovaditvā uyyojesi gacchatha bhaginiyo kāloti . Atha kho tā bhikkhuniyo āyasmato nandakassa bhāsitaṃ abhinanditvā anumoditvā uṭṭhāyāsanā āyasmantaṃ nandakaṃ abhivādetvā padakkhiṇaṃ katvā yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ aṭṭhaṃsu . ekamantaṃ ṭhitā kho tā bhikkhuniyo bhagavā etadavoca gacchatha bhikkhuniyo kāloti . atha kho tā bhikkhuniyo bhagavantaṃ abhivādetvā padakkhiṇaṃ katvā pakkamiṃsu.