[848] Puna caparaṃ sārīputta bhikkhunā iti paṭisañcikkhitabbaṃ bhāvitā nu kho me satta bojjhaṅgāti . sace sārīputta bhikkhu paccavekkhamāno evaṃ jānāti abhāvitā kho me satta bojjhaṅgāti tena sārīputta bhikkhunā sattannaṃ bojjhaṅgānaṃ bhāvanāya vāyamitabbaṃ . sace pana sārīputta bhikkhu paccavekkhamāno evaṃ jānāti bhāvitā kho me satta bojjhaṅgāti tena sārīputta bhikkhunā teneva pītipāmujjena vihātabbaṃ ahorattānusikkhinā kusalesu dhammesu.

[849] Puna caparaṃ sārīputta bhikkhunā iti paṭisañcikkhitabbaṃ bhāvito nu kho me ariyo aṭṭhaṅgiko maggoti . sace sārīputta bhikkhu paccavekkhamāno evaṃ jānāti abhāvito kho me ariyo aṭṭhaṅgiko maggoti tena sārīputta bhikkhunā ariyassa aṭṭhaṅgikassa maggassa bhāvanāya vāyamitabbaṃ . sace pana sārīputta bhikkhu paccavekkhamāno evaṃ jānāti bhāvito kho me ariyo Aṭṭhaṅgiko maggoti tena sārīputta bhikkhunā teneva pītipāmujjena vihātabbaṃ ahorattānusikkhinā kusalesu dhammesu.

[850] Puna caparaṃ sārīputta bhikkhunā iti paṭisañcikkhitabbaṃ bhāvitā nu kho me samatho ca vipassanā cāti . sace sārīputta bhikkhu paccavekkhamāno evaṃ jānāti abhāvitā kho me samatho ca vipassanā cāti tena sārīputta bhikkhunā samathavipassanānaṃ bhāvanāya vāyamitabbaṃ . sace pana sārīputta bhikkhu paccavekkhamāno evaṃ jānāti bhāvitā kho me samatho ca vipassanā cāti tena sārīputta bhikkhunā teneva pītipāmujjena vihātabbaṃ ahorattānusikkhinā kusalesu dhammesu.

[851] Puna caparaṃ sārīputta bhikkhunā iti paṭisañcikkhitabbaṃ sacchikatā nu kho me vijjā ca vimutti cāti . sace sārīputta bhikkhu paccavekkhamāno evaṃ jānāti asacchikatā kho me vijjā ca vimutti cāti tena sārīputta bhikkhunā vijjāya ca vimuttiyā ca sacchikiriyāya vāyamitabbaṃ . sace pana sārīputta bhikkhu paccavekkhamāno evaṃ jānāti sacchikatā kho me vijjā ca vimutti cāti tena sārīputta bhikkhunā teneva pītipāmujjena vihātabbaṃ ahorattānusikkhinā kusalesu dhammesu.