[70] Bhagavā etadavoca pañca kho ime sunakkhatta kāmaguṇā katame pañca cakkhuviññeyyā rūpā iṭṭhā kantā manāpā piyarūpā kāmūpasañhitā rajanīyā sotaviññeyyā saddā ... ghānaviññeyyā gandhā ... jivhāviññeyyā rasā ... Kāyaviññeyyā phoṭṭhabbā iṭṭhā kantā manāpā piyarūpā kāmūpasañhitā rajanīyā ime kho sunakkhatta pañca kāmaguṇā.

[71] Ṭhānaṃ kho panetaṃ sunakkhatta vijjati yaṃ idhekacco Purisapuggalo lokāmisādhimutto assa . lokāmisādhimuttassa kho sunakkhatta purisapuggalassa tappaṭirūpī ceva kathā saṇṭhāti tadanudhammañca anuvitakketi anuvicāreti tañca purisaṃ bhajati tena ca cittiṃ āpajjati āneñjapaṭisaṃyuttāya ca pana kathāya kacchamānāya na sussusati na ca sotaṃ odahati na aññā cittaṃ upaṭṭhapeti na ca taṃ purisaṃ bhajati na ca tena cittiṃ āpajjati . seyyathāpi sunakkhatta puriso sakamhā gāmā vā nigamā vā ciravippavuttho assa . so aññataraṃ purisaṃ passeyya tamhā gāmā vā nigamā vā acirapakkantaṃ . so taṃ purisaṃ tassa gāmassa vā nigamassa vā khemattañca subhikkhattañca appābādhattañca puccheyya . tassa so puriso tassa gāmassa vā nigamassa vā khemattañca subhikkhattañca appābādhattañca saṃseyya . taṃ kiṃ maññasi sunakkhatta api nu so puriso tassa purisassa sussuseyya sotaṃ odaheyya aññā cittaṃ upaṭṭhapeyya tañca purisaṃ bhajeyya tena ca cittiṃ āpajjeyyāti . Evaṃ bhante. {71.1} Evameva kho sunakkhatta ṭhānametaṃ vijjati yaṃ idhekacco purisapuggalo lokāmisādhimutto assa . lokāmisādhimuttassa kho sunakkhatta purisapuggalassa tappaṭirūpī ceva kathā saṇṭhāti tadanudhammañca anuvitakketi anuvicāreti tañca purisaṃ bhajati tena ca cittiṃ āpajjati āneñjapaṭisaṃyuttāya ca pana kathāya kacchamānāya Na sussusati na sotaṃ odahati na aññā cittaṃ upaṭṭhapeti na ca taṃ purisaṃ bhajati na ca tena cittiṃ āpajjati . so evamassa veditabbo [1]- lokāmisādhimutto purisapuggaloti.