[87] Puna caparaṃ bhikkhave ariyasāvako iti paṭisañcikkhati nāhaṃ kvacini na kassaci kiñcanatasmiṃ na ca mama kvacini kismiñci kiñcanaṃ natthīti . tassa evaṃ paṭipannassa tabbahulavihārino āyatane cittaṃ pasīdati sampasāde sati etarahi vā ākiñcaññāyatanaṃ samāpajjati paññāya vā adhimuccati . kāyassa bhedā parammaraṇā ṭhānametaṃ vijjati yantaṃ saṃvattanikaṃ viññāṇaṃ assa ākiñcaññāyatanūpagaṃ . Ayaṃ bhikkhave tatiyā ākiñcaññāyatanasappāyā paṭipadā akkhāyati.

[88] Puna caparaṃ bhikkhave ariyasāvako iti paṭisañcikkhati ye ca diṭṭhadhammikā kāmā ye ca samparāyikā kāmā yā ca diṭṭhadhammikā kāmasaññā yā ca samparāyikā kāmasaññā ye ca diṭṭhadhammikā rūpā ye ca samparāyikā rūpā yā ca diṭṭhadhammikā rūpasaññā Yā ca samparāyikā rūpasaññā yā ca āneñjasaññā yā ca ākiñcaññāyatanasaññā sabbā saññā yatthetā aparisesā nirujjhanti etaṃ santaṃ etaṃ paṇītaṃ yadidaṃ nevasaññānāsaññāyatananti . Tassa evaṃ paṭipannassa tabbahulavihārino āyatane cittaṃ pasīdati sampasāde sati etarahi vā nevasaññānāsaññāyatanaṃ samāpajjati paññāya vā adhimuccati . kāyassa bhedā parammaraṇā ṭhānametaṃ vijjati yantaṃ saṃvattanikaṃ viññāṇaṃ assa nevasaññānāsaññāyatanūpagaṃ . Ayaṃ bhikkhave nevasaññānāsaññāyatanasappāyā paṭipadā akkhāyatīti.

[89] Evaṃ vutte āyasmā ānando bhagavantaṃ etadavoca idha bhante bhikkhu evaṃ paṭipanno hoti no cassa no ca me siyā [1]- na me bhavissati yadatthi yambhūtaṃ taṃ pajahāmīti [2]- upekkhaṃ paṭilabhati parinibbāyeyya nu kho so bhante bhikkhu na vā parinibbāyeyyāti. Apetthekacco ānanda bhikkhu parinibbāyeyya apetthekacco bhikkhu na parinibbāyeyyāti . ko nu kho bhante hetu ko paccayo yenāpetthekacco bhikkhu parinibbāyeyya apetthekacco bhikkhu na parinibbāyeyyāti.

[90] Idhānanda bhikkhu evaṃ paṭipanno hoti no cassa no ca me siyā na me bhavissati yadatthi yambhūtaṃ taṃ pajahāmīti upekkhaṃ paṭilabhati so taṃ upekkhaṃ abhinandati abhivadati ajjhosāya tiṭṭhati Tassa taṃ upekkhaṃ abhinandato abhivadato ajjhosāya tiṭṭhato tannissitaṃ hoti viññāṇaṃ tadupādānaṃ saupādāno ānanda bhikkhu na parinibbāyatīti . kahaṃ pana so bhante bhikkhu upādiyamāno upādiyatīti . nevasaññānāsaññāyatanaṃ ānandāti . upādānaseṭṭhaṃ kira so bhante bhikkhu upādiyamāno upādiyatīti . upādānaseṭṭhaṃ so ānanda bhikkhu upādiyamāno upādiyati upādānaseṭṭhaṃ hetaṃ ānanda yadidaṃ nevasaññānāsaññāyatanaṃ.