[107] Atha kho vassakāro brāhmaṇo magadhamahāmatto rājagahe kammante anusaññāyamāno yena gopakamoggallānassa brāhmaṇassa kammanto yenāyasmā ānando tenupasaṅkami upasaṅkamitvā āyasmatā ānandena saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno kho vassakāro brāhmaṇo magadhamahāmatto āyasmantaṃ ānandaṃ etadavoca kāya nuttha bho ānanda etarahi kathāya sannisinnā kā ca pana te antarākathā vippakatāti . idha maṃ brāhmaṇa Gopakamoggallāno brāhmaṇo evamāha atthi nu kho bho ānanda ekabhikkhupi tehi dhammehi sabbena sabbaṃ sabbathā sabbaṃ samannāgato yehi dhammehi samannāgato so bhavaṃ gotamo ahosi arahaṃ sammāsambuddhoti evaṃ vutte ahaṃ brāhmaṇa gopakamoggallānaṃ brāhmaṇaṃ etadavocaṃ natthi kho brāhmaṇa ekabhikkhupi tehi dhammehi sabbena sabbaṃ sabbathā sabbaṃ samannāgato yehi dhammehi samannāgato so bhagavā ahosi arahaṃ sammāsambuddho so hi brāhmaṇa bhagavā anuppannassa maggassa uppādetā asañjātassa maggassa sañjānetā anakkhātassa maggassa akkhātā maggaññū maggavidū maggakovido maggānugā ca pana etarahi sāvakā viharanti pacchā samannāgatāti mayaṃ kho no brāhmaṇa gopakamoggallānena brāhmaṇena saddhiṃ antarākathā vippakatā atha tvaṃ anuppattoti.

[108] Atthi nu kho bho ānanda ekabhikkhupi tena bhotā gotamena ṭhapito ayaṃ vo mamaccayena paṭisaraṇaṃ bhavissatīti yaṃ tumhe etarahi paṭidhāveyyāthāti . natthi kho brāhmaṇa ekabhikkhupi tena bhagavatā jānatā passatā arahatā sammāsambuddhena ṭhapito ayaṃ vo mamaccayena paṭisaraṇaṃ bhavissatīti yaṃ mayaṃ etarahi paṭidhāveyyāmāti .

[109] Atthi pana bho ānanda ekabhikkhupi saṅghena sammato Sambahulehi therehi bhikkhūhi ṭhapito ayaṃ no bhagavato accayena paṭisaraṇaṃ bhavissatīti yaṃ tumhe etarahi paṭidhāveyyāthāti . natthi kho brāhmaṇa ekabhikkhupi saṅghena sammato sambahulehi therehi bhikkhūhi ṭhapito ayaṃ no bhagavato accayena paṭisaraṇaṃ bhavissatīti yaṃ mayaṃ etarahi paṭidhāveyyāmāti . evaṃ appaṭisaraṇe ca pana bho ānanda ko hetu dhammasāmaggiyāti . na kho mayaṃ brāhmaṇa appaṭisaraṇā sappaṭisaraṇā mayaṃ brāhmaṇa dhammapaṭisaraṇāti.