[110] Atthi nu kho bho ānanda ekabhikkhupi tena bhotā gotamena ṭhapito ayaṃ vo mamaccayena paṭisaraṇaṃ bhavissatīti yaṃ tumhe etarahi paṭidhāveyyāthāti iti puṭṭho samāno natthi kho brāhmaṇa ekabhikkhupi tena bhagavatā jānatā passatā arahatā sammāsambuddhena ṭhapito ayaṃ vo mamaccayena paṭisaraṇaṃ bhavissatīti yaṃ mayaṃ etarahi paṭidhāveyyāmāti vadesi . atthi pana bho ānanda ekabhikkhupi saṅghena sammato sambahulehi therehi bhikkhūhi ṭhapito ayaṃ no bhagavato accayena paṭisaraṇaṃ bhavissatīti yaṃ tumhe etarahi paṭidhāveyyāthāti iti puṭṭho samāno natthi kho brāhmaṇa ekabhikkhupi saṅghena sammato sambahulehi therehi bhikkhūhi ṭhapito ayaṃ no bhagavato accayena paṭisaraṇaṃ bhavissatīti yaṃ mayaṃ etarahi paṭidhāveyyāmāti vadesi . evaṃ appaṭisaraṇe ca pana bho ānanda ko hetu dhammasāmaggiyāti iti puṭṭho samāno na kho mayaṃ Brāhmaṇa appaṭisaraṇā sappaṭisaraṇā mayaṃ brāhmaṇa dhammapaṭisaraṇāti vadesi . imassa pana bho ānanda bhāsitassa kathaṃ attho daṭṭhabboti.

[111] Atthi kho brāhmaṇa tena bhagavatā jānatā passatā arahatā sammāsambuddhena bhikkhūnaṃ sikkhāpadaṃ paññattaṃ pātimokkhaṃ uddiṭṭhaṃ te mayaṃ tadahuposathe yāvatikā ekaṃ gāmakkhettaṃ upanissāya viharāma te sabbe ekajjhaṃ sannipatāma sannipatitvā yassa taṃ vattati taṃ ajjhesāma tasmiṃ ce bhaññamāne hoti bhikkhussa āpatti hoti vītikkamo taṃ mayaṃ yathādhammaṃ yathānusiṭṭhaṃ kāremāti na kira no bhavanto kārenti dhammo no kāretīti . Atthi nu kho bho ānanda ekabhikkhupi yaṃ tumhe etarahi sakkarotha garukarotha mānetha pūjetha sakkatvā garukatvā upanissāya viharathāti . Atthi kho brāhmaṇa ekabhikkhupi yaṃ mayaṃ etarahi sakkaroma garukaroma mānema pūjema sakkatvā garukatvā upanissāya viharāmāti.

[112] Atthi kho bho ānanda ekabhikkhupi tena bhotā gotamena ṭhapito ayaṃ vo mamaccayena paṭisaraṇaṃ bhavissatīti yaṃ tumhe etarahi paṭidhāveyyāthāti iti puṭṭho samāno natthi kho brāhmaṇa ekabhikkhupi tena bhagavatā jānatā passatā arahatā sammāsambuddhena ṭhapito ayaṃ vo mamaccayena paṭisaraṇaṃ bhavissatīti yaṃ mayaṃ etarahi paṭidhāveyyāmāti vadesi . atthi pana bho ānanda ekabhikkhupi Saṅghena sammato sambahulehi therehi bhikkhūhi ṭhapito ayaṃ no bhagavato accayena paṭisaraṇaṃ bhavissatīti yaṃ tumhe etarahi paṭidhāveyyāthāti iti puṭṭho samāno natthi kho brāhmaṇa ekabhikkhupi saṅghena sammato sambahulehi therehi bhikkhūhi ṭhapito ayaṃ no bhagavato accayena paṭisaraṇaṃ bhavissatīti yaṃ mayaṃ etarahi paṭidhāveyyāmāti vadesi . atthi nu kho bho ānanda ekabhikkhupi yaṃ tumhe etarahi sakkarotha garukarotha mānetha pūjetha sakkatvā garukatvā upanissāya viharathāti iti puṭṭho samāno atthi kho brāhmaṇa ekabhikkhupi yaṃ mayaṃ etarahi sakkaroma garukaroma mānema pūjema sakkatvā garukatvā upanissāya viharāmāti vadesi . imassa bho ānanda bhāsitassa kathaṃ attho daṭṭhabboti.