[134] Kathañca bhikkhave asappuriso asappurisabhattī hoti . Idha bhikkhave asappurisassa ye te samaṇabrāhmaṇā asaddhā ahirikā anottappino appassutā kusītā muṭṭhassatino duppaññā tyassa mittā honti te sahāyā evaṃ kho bhikkhave asappuriso asappurisabhattī hoti.

[135] Kathañca bhikkhave asappuriso asappurisacintī hoti . Idha bhikkhave asappuriso attabyābādhāyapi ceteti parabyābādhāyapi ceteti ubhayabyābādhāyapi ceteti evaṃ kho bhikkhave asappuriso asappurisacintī hoti.

[136] Kathañca bhikkhave asappuriso asappurisamantī hoti . Idha bhikkhave asappuriso attabyābādhāyapi manteti parabyābādhāyapi manteti ubhayabyābādhāyapi manteti evaṃ kho bhikkhave asappuriso asappurisamantī hoti.

[137] Kathañca bhikkhave asappuriso asappurisavāco hoti . Idha bhikkhave asappuriso musāvādī hoti pisuṇavāco hoti pharusavāco hoti samphappalāpī hoti evaṃ kho bhikkhave asappuriso asappurisavāco hoti.