[138] Kathañca bhikkhave asappuriso asappurisakammanto hoti . Idha bhikkhave asappuriso pāṇātipātī hoti adinnādāyī hoti kāmesumicchācārī hoti evaṃ kho bhikkhave asappuriso asappurisakammanto hoti.

[139] Kathañca bhikkhave asappuriso asappurisadiṭṭhī hoti . idha bhikkhave asappuriso evaṃdiṭṭhiko hoti natthi dinnaṃ natthi yiṭṭhaṃ natthi hutaṃ natthi sukatadukkaṭānaṃ kammānaṃ phalaṃ vipāko natthi ayaṃ loko natthi paro loko natthi mātā natthi pitā natthi sattā opapātikā natthi loke samaṇabrāhmaṇā sammaggatā sammāpaṭipannā ye imañca lokaṃ parañca lokaṃ sayaṃ abhiññā sacchikatvā pavedentīti evaṃ kho bhikkhave asappuriso asappurisadiṭṭhī hoti.

[140] Kathañca bhikkhave asappuriso asappurisadānaṃ deti . Idha bhikkhave asappuriso asakkaccaṃ dānaṃ deti asahatthā dānaṃ deti acittiṃ katvā dānaṃ deti apaviṭṭhaṃ dānaṃ deti anāgamanadiṭṭhiko dānaṃ deti evaṃ kho bhikkhave asappuriso asappurisadānaṃ deti.

[141] Sa kho so bhikkhave asappuriso evaṃ asaddhammasamannāgato evaṃ asappurisabhattī evaṃ asappurisacintī evaṃ asappurisamantī evaṃ asappurisavāco evaṃ asappurisakammanto evaṃ asappurisadiṭṭhī evaṃ asappurisadānaṃ datvā kāyassa bhedā parammaraṇā yā asappurisānaṃ Gati tattha uppajjati . kā ca bhikkhave asappurisānaṃ gati nirayo vā tiracchānayoni vā.