[166] Evamme sutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tatra kho bhagavā bhikkhū āmantesi bhikkhavoti. Bhadanteti te bhikkhū bhagavato paccassosuṃ.

[167] Bhagavā etadavoca idha bhikkhave bhikkhu aññaṃ byākaroti khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti . tassa bhikkhave bhikkhuno bhāsitaṃ neva abhinanditabbaṃ na paṭikkositabbaṃ . anabhinanditvā appaṭikkositvā pañho pucchitabbo cattārome āvuso vohārā tena bhagavatā jānatā passatā arahatā sammāsambuddhena sammadakkhātā katame cattāro diṭṭhe diṭṭhavāditā sute sutavāditā mute mutavāditā viññāte viññātavāditā ime kho āvuso cattāro vohārā tena bhagavatā jānatā passatā arahatā sammāsambuddhena sammadakkhātā . kathaṃ jānato panāyasmato kathaṃ passato imesu catūsu vohāresu anupādāya āsavehi cittaṃ vimuttanti.

[168] Khīṇāsavassa bhikkhave bhikkhuno vusitavato katakaraṇīyassa ohitabhārassa anuppattasadatthassa parikkhīṇabhavasaññojanassa sammadaññāvimuttassa ayamanudhammo hoti veyyākaraṇāya diṭṭhe kho Ahaṃ āvuso anupāyo anapāyo anissito appaṭibaddho vippamutto visaṃyutto vimariyādikatena cetasā viharāmi sute kho ahaṃ āvuso ... Mute kho ahaṃ āvuso ... viññāte kho ahaṃ āvuso anupāyo anapāyo anissito appaṭibaddho vippamutto visaṃyutto vimariyādikatena cetasā viharāmi evaṃ kho me āvuso jānato evaṃ passato imesu catūsu vohāresu anupādāya āsavehi cittaṃ vimuttanti . tassa bhikkhave bhikkhuno sādhūti bhāsitaṃ abhinanditabbaṃ anumoditabbaṃ . sādhūti bhāsitaṃ abhinanditvā anumoditvā uttariṃ pañho pucchitabbo pañca kho ime āvuso upādānakkhandhā tena bhagavatā jānatā passatā arahatā sammāsambuddhena sammadakkhātā katame pañca seyyathīdaṃ rūpūpādānakkhandho vedanūpādānakkhandho saññūpādānakkhandho saṅkhārūpādānakkhandho viññāṇūpādānakkhandho ime kho āvuso pañcupādānakkhandhā tena bhagavatā jānatā passatā arahatā sammāsambuddhena sammadakkhātā . kathaṃ jānato panāyasmato kathaṃ passato imesu pañcasupādānakkhandhesu anupādāya āsavehi cittaṃ vimuttanti.